Mar 22,2019

 http://www.navatelangana.com/article/net-vyaasam/782502

కాపలా మాని కథలు చెపుతున్న చౌకీదార్‌!

చారువాలాతో మొదలైన ప్రయాణం ఈ ఐదేండ్లల్లో చౌకీదార్‌ వరకు వచ్చింది. 2014 ఎన్నికల్లో ఒక చారువాలాగా జీవితం ప్రారంభించి ప్రధాని పదవికి పోటీ పడగలుగుతున్నాను అన్నది మోడీ ప్రచారంలో కీలక అంశంగా ఉండేది. 2014 ఎన్నికల సందర్భంగా చారు కొట్టు దగ్గర చర్చ (చారు పే చర్చ) ఓ విన్నూత్న ఎన్నికల ప్రచార రూపంగా ముందుకు తెచ్చారు. ఈ చర్చలో ఆరెస్సెస్‌, బీజేపీ కార్యకర్తలు దేశంలో పెరుగుతున్న అవినీతి, నిరుద్యోగం, ధరల పెరుగుదల, మహిళలపై అత్యాచారాలు, పతనమవుతున్న రూపాయి, ఆర్థిక వ్యవస్థ వంటి అనేక అంశాలు చర్చకు పెట్టారు. ఎన్నికలయ్యాయి. ఓట్లు దండుకున్నారు. గద్దె నెక్కారు. చారు దుకాణం దారులను మర్చిపోయారు.
ఈ ఐదేండ్లల్లో పాల ధర ప్రభుత్వ లెక్కల్లోనే 60పాయింట్లు పెరిగింది. పాలబూత్‌లో లీటర్‌ పాకెట్‌ ధర 2014లో మోడీ అధికారానికి వచ్చే నాటికి రూ.36గా ఉంటే 2019 మార్చి 20 నాటికి రూ.42కు పెరిగింది. అంటే ఈ ఐదేండ్లలో పాల ధర 16శాతం పెరిగింది. 2014 జూన్‌లో టీ పొడి కిలో రూ.150 ఉంటే, 2019 ఫిబ్రవరి నాటికి రూ.180కు పెరిగింది. అంటే 20శాతం. ఆ మేరకు టీ దుకాణం యజమానుల ఆదాయాలు పడిపోతున్నాయి. చారువాలాలు ప్రధాని కావాలని ఆశపడటం అటుంచి పిల్లలను బడిలోకి పంపించేంత ఆదాయం కూడా సంపాదించలేని పరిస్థితి. బహుశా ఈ కారణంగానే నేమో 2019 ఎన్నికల్లో చారువాలాలను వదిలేసి మోడీ కొత్తగా చౌకీదార్‌ అవతారమెత్తాడు.
మార్చి 20న దాదాపు పాతిక లక్షలమంది చౌకీదార్లుతో ప్రధాని మోడీ పెద్ద మనసు చేసుకుని మాట్లాడినట్టు ప్రభుత్వం ప్రకటించింది. సామాజిక మాధ్యమాల్లో దీనికి సంబంధించిన ఓ 22నిముషాల వాయిస్‌ క్లిప్‌ కూడా విడుదలయ్యింది. ఈ 22నిముషాల్లో కేవలం ఉత్తరప్రదేశ్‌, ఒడిస్సా, ఏపీల నుంచి ముగ్గురు మాత్రమే ప్రధానితో ఫోన్‌లో మాట్లాడగలిగారు. ఈ కసరత్తు ఏ ప్రమాణాల ప్రకారం చూసుకున్నా ఆహౌరాత్రులు కష్టపడుతున్న చౌకీదార్‌ల సమస్యలు తెలుసుకుని వారిని సమాధానపర్చేందుకు కాదు అన్నది స్పష్టంగా తెలుస్తుంది. ప్రధానితో ముచ్చటించిన ముగ్గురు గూర్ఖాలు కూడా తమ సర్వీస్‌ కండిషన్స్‌ గురించో, నామమాత్రంగా ఉన్న వేతనాల గురించో లేక నివాస ప్రాంత సమస్యల గురించో మాట్లాడనే లేదు. ఉత్తరప్రదేశ్‌ నుంచి మాట్లాడిన ఓ మహిళ మీది తెనాలి మాది తెనాలి అన్నట్టు మీరు గూర్ఖాయే నేను గూర్ఖాయే. ప్రతిపక్షాల రాజకీయ ప్రచారంతో అవమానాల పాలవుతున్నామని చెప్పారు. ఒడిస్సా నుంచి మాట్లాడిన మరో వ్యక్తి పుల్వామా దాడికి పాల్పడిన పాకిస్థాన్‌కు మోడీ తిరుగులేని సమాధానం ఇచ్చారని ప్రశంసించటానికి పరిమితమయ్యారు. చివరిగా శ్రీకాకుళం నుంచి మాట్లాడిన వ్యక్తి రానున్న ఎన్నికల్లో మోడీ ఢంకా భజాయించి గెలుస్తారని, ఆందోళన పడొద్దని సముదాయించారు. ఈ 22నిముషాల పాటు ఒకవైపున మాట్లాడుతున్న మోడీని చూపిస్తూ మరో వైపున వివిధ ప్రాంతాల్లో యూనిఫారాలు ధరించిన గూర్ఖాల చిత్రాలు ప్రదర్శించారు.

ఈ ఉపన్యాసంలో తాను ఐదేండ్లుగా దేశానికి కాపలా కాస్తున్నానని చెప్పుకున్నారు. తనలాగే మిగిలిన చౌకీదార్లంతా ఉగ్రవాదం మొదలు స్వచ్ఛభారత్‌ వరకు అన్ని పనుల్లో దేశానికి రక్షణ కల్పిస్తున్నారని చెప్పటం విడ్డూరంగా ఉంది. ఉగ్రవాదంనుంచి దేశాన్ని చౌకీదార్లు కాపాడుతున్నారని చెప్పటం కన్నా ప్రాణత్యాగాలు చేస్తున్న సైన్యాన్ని అవమానించటం మరోటి ఏముంది? నిజంగా మోడీ దుడ్డు కర్ర పట్టుకుని సరిహద్దుల్లో కాపలా కాస్తుంటే నీరవ్‌ మోడీ దేశం వదిలి ఎందుకు పారిపోయినట్టు? విజరుమాల్యా లండన్‌లో కేళీవిలాసాల్లో ఎలా మునిగి తేలుతున్నట్టు? బ్యాంకులకు రూ.37వేల కోట్లు ఎగ్గొట్టిన అనిల్‌ అంబానీ జైల్లో కూర్చోకుండా దర్జాగా ఎలా వ్యాపారాలు చేసుకుంటున్నట్టు? చౌకీదార్‌ మోడీ కండ్లు గప్పి దాదాపు రూ.18 లక్షల కోట్లు రుణాలు తీసుకున్న పెద్ద పెద్ద బాబులు దర్జాగా ఎలా బతగ్గలుగుతున్నారు.
స్వయంగా తనే కాపలా కాస్తుంటే నరేంద్ర ధబోల్కర్‌, గోవింద పన్సారే, గౌరీ లంకేశ్‌లను పట్టపగలే ఎలా కాల్చి చంపారో, కాల్చి చంపిన హిందూ జనజాగృతి సంస్థకు చెందిన ముద్దాయిలు ఇంకా ఎందుకు అరెస్టు కాలేదో ప్రధాన చౌకీదార్‌ వివరించాలి. చౌకీదార్‌ పాలనలో విద్వేష హత్యలు గత 70ఏండ్లల్లో లేనంతగా పెరిగాయి. ఉనాలో పట్టపగలే దళితులను లారీకి కట్టి విరగబాదుతూ వీడియోలు తీసుకున్న ఆరెస్సెస్‌ కార్యకర్తలు యదేచ్ఛగా తిరుగుతూనే ఉన్నారు. తాజాగా పుల్వామా దాడి తర్వాత దేశవ్యాప్తంగా వివిధ ప్రాంతాల్లో కాశ్మీరీ యువతపై బరితెగించి దాడులకు దిగిన కాషాయధారులపై కనీసం ప్రాధమిక దర్యాప్తు నివేదిక కూడా దాఖలు కాలేదు. బీజేపీ చౌకీదారీతనం ఎంతగా దిగజారిందంటే ఉత్తరప్రదేశ్‌లో యోగి ఆదిత్యనాథ్‌ అధాకారానికి వచ్చాక రాష్ట్రంలో బీజేపీ నాయకులు, కార్యకర్త లందరి మీద ఉన్న కేసులు రద్దు చేస్తూ ఏకంగా చట్టాన్నే ఆమోదించారు. ఇవన్నీ పరిశీలించినప్పుడు మరి చౌకీదార్‌ మోడీ ఎవరికి కాపలాగాస్తున్నారో దేశానికి తేటతెల్లంగా కనపడుతున్నది.

చౌకీదారు పహరాలోనే దేశంలో ముస్లిం మైనారిటీలు, హేతువాదులు, రాజకీయ ప్రత్యర్థుల మీద దాడులు పెద్దఎత్తున పెరిగాయి. మహిళల మీద జరుగుతున్న అత్యాచారాల మీద ఎటువంటి దర్యాప్తు లేదా చర్యలు లేవు. ప్రత్యేకించి మూక హత్యలు ప్రభుత్వ వ్యతిరేకులను అణచివేయడమే సంఘపరివార్‌ వ్యూహంగా మారింది. అయినా ప్రధాన చౌకీదార్‌ నోటి నుంచి ఈ దాడులను ఖండిస్తూ పల్లెత్తు మాట రాలేదు. ఈ మూక హత్యలపై కేసులు నమోదు కాలేదు. అయినా నేను జాగ్రత్తగా కాపలా కాస్తున్నాను అని ప్రధాని మోడీ చెప్పుకోవటానికి ప్రయత్నం చేస్తున్నారు. ప్రత్యేకించి ఈ ఐదేండ్లల్లో వివిధ రాష్ట్రాల్లో 63చోట్ల గో సంరక్షణ పేరుతో అల్ప సంఖ్యాక వర్గాలకు లక్ష్యంగా చేసుకుని దాడులు జరిగాయి. ఈ దాడులు అంతర్జాతీయంగా దేశ ప్రతిష్టను దిగజార్చాయి. అయినా కేంద్ర ప్రభుత్వానికి, మన చౌకీదారుకు చీమ కుట్టినట్టు కూడా లేదు. తన పాలనలో బహుచక్కగా పహరా కాస్తున్నానని కాపలదారుల గుంపులో చేరానని ఆత్మ వంచనకు పాల్పడ్డారు మోడీ. ఇటువంటి గారడీలు చూసి మోసపోవద్దని మోడీచేత కాళ్లు కడిగించుకున్న ఐదుగురు పారిశుధ్య కార్మికులు ఈ మధ్య ఓ ఇంటర్వూ ఇచ్చారు. ప్రధాని కట్టుదిట్టమైన చలవ గదిలో పూర్తి భద్రతల మధ్య ఐదుగురు పారిశుధ్య కార్మికులను కూర్చో బెట్టి వెండి పళ్లాల్లో వాళ్ల కాళ్లు పెట్టించి రాగి చెంబుతో కార్మికుల కాళ్లు కడిగారు. ఇదంతా ఐదు నిమిషాల్లో పూర్తి అయ్యింది. కనీసం చౌకీదార్లతో అయినా 22నిముషాలు ముచ్చటించారు కానీ పారిశుధ్య కార్మికులకు ఆ ముచ్చట కూడా దక్కలేదు. కాళ్లు కడిగించుకుని బయటకు వచ్చిన పారిశుధ్య కార్మికులు ఇలా ఆయన ఎందుకు కాళ్లు కడిగారో తెలీదు కానీ దీనివల్ల ఒరిగిందేమీ లేదని స్పష్టం చేశారు. పారిశుధ్య కార్మికులకు ప్రభుత్వం నిజంగా గుర్తింపు గౌరవం ఇవ్వదల్చుకుంటే ఇలా కాళ్లా వేళ్లా పడాల్సిన పని లేదని, తమకు ఉద్యోగ భద్రత కల్పించి కాంట్రాక్టర్ల వేధింపుల నుంచి విముక్తి కల్పిస్తే చాలని మొత్తుకున్నారు. ఈ టక్కుటమార గారడీ విద్యలన్నీ చూశాక చిన్నప్పుడు విన్న ఓ కథ గుర్తుకొస్తోంది.

ఓ యజమాని దేహదారుఢ్యం కలిగిన ఓ వ్యక్తిని రాత్రి కాపలాకు కుదుర్చుకుంటారు. రోజూ ఈ కాపలదారుడు యజమానికి ఆసక్తికరమైన కథలు వినిపిస్తూ ఉండేవాడు. ఇదే అదనుగా భావించిన దొంగలు తమ పని తాము పూర్తి చేసుకున్నారు జయప్రదంగా. ఈ విషయం గమనించిన యజమాని నెలకాగానే కాపలాదారుకు రెట్టింపు జీతం ఇచ్చి మరునాటి నుంచీ రావద్దని ఉద్యోగం నుంచి పీకేశాడు. కారణం ఏమిటని అడిగితే కాపలాకు పెట్టుకున్నాను కానీ కథలు చెప్పటానికి కాదని యజమాని గద్దించాడట. మరి ప్రజాస్వామ్యంలో ప్రజలే యజమానులు. వారు వేసే ఓటే ప్రజా ప్రతినిధులకు ఐదేండ్ల పాటు జీతం ఇచ్చే తాళం చెవి. ఈ గారడీ విద్యతో కథలు చెప్పి ప్రజ లను మోసగిస్తున్న నయా కాపలాదారులను కూడా సాగనంపాల్సిన సమయం దగ్గర పడింది.
- ప్రశాంత్‌

 Mar 25,2019

http://www.navatelangana.com/article/net-vyaasam/783627

ఏది భారత జాతీయత ?

దేశంలో గత కొంత కాలంగా జాతీయత పేరు మీద కుహనా జాతీయవాదం వెర్రితలలు వేస్తోంది. ప్రభుత్వ ప్రాయోజిత భావజాలాన్ని వ్యతిరేకించే వారు, ప్రశ్నించేవారు దేశ ద్రోహులుగా ముద్రించబడుతున్నారు. దేశ సామాజిక ఆర్థిక రాజకీయ వ్యవస్థలను ప్రభావితం చేస్తున్న అంశాల పట్ల ప్రభుత్వ ప్రాయోజిత నిపుణులు, మేధావుల అభిప్రాయాలకు భిన్నంగా స్వతంత్ర అభిప్రాయాలు కలిగి ఉండటం రాజద్రోహంగా మారిపోయింది. ఈ పరిణామాలన్నింటి వెనక దండలో దారంలాగా కొనసాగుతున్న అంశం జాతీయత గురించిన చర్చ. పాలక వర్గాల అభిప్రాయాలే సర్వసాధారణంగా ప్రజాభిప్రాయాలుగా చెలామణీ అవుతాయన్న మార్క్స్‌ సూత్రీకరణ తాజా పరిణామాల నేపథ్యంలో మరింత కొట్టొచ్చినట్టు కనిపిస్తోంది. ప్రాయోజిత ప్రసార మాధ్యమాలు (ఎంబెడెడ్‌ జర్నలిజం) ఏకశిలా సదృశమైన ఉన్మత్త హిందూత్వమే నిజమైన జాతీయత అని నమ్మించ చూస్తున్నాయి. సమ్మిళిత సాంస్కృతిక సామాజిక పునాదులు కలిగిన భారతీయతకు ప్రత్యామ్నాయంగా ప్రచారంలో పెడుతున్నాయి.
నిజానికి భారతీయ జాతీయత అంటే ఏమిటన్న విషయాన్ని నిర్ధారించే కోణంలో చారిత్రక పరిశోధనలు లేకపోవటంతో పాచిపళ్ల దాసుడు పాడిందే పాటగా మారింది. ఈ కాలంలో ఉన్మత్త హిందూత్వ శక్తులు రాజ్యాంగ పునాదులుపై సాగిస్తున్న విధ్వంసక దాడికి మరింత పదును పెట్టిన సందర్భంగా తాజాగా భారత జాతీయ అన్న భావనపై సాగుతున్న దాడిని చెప్పుకోవచ్చు. ఈ నేపథ్యంలో భారతీయత గురించి ప్రజాతంత్ర రాజ్యాంగం అందించిన అవగాహనకు నియంతృత్వ ధోరణులకు నిలువెత్తు నిదర్శనం అయిన ఆరెస్సెస్‌ ముందుకు తెస్తున్న అవగాహనకు మధ్య ఉన్న విభజన రేఖను అర్థం చేసుకోలేకపోతే మరో తరం మతోన్మాదులు ప్రేరేపించే భావోద్వేగాలకు బలికాక తప్పని పరిస్థితి కనిపిస్తుంది.

చారిత్రక పరిశీలన కోణం నుండి చూసినపుడు ఆధునిక ప్రపంచ చరిత్ర, ఆధునిక జాతీయ రాజ్యాల చరిత్ర, పెట్టుబడిదారీ వ్యవస్థ దాని పరిణామ చరిత్ర విడదీయ రానంతగా ఒకదానితో ఒకటి పెనవేసుకుపోయాయి. చారిత్రక పరిణామ క్రమంలో దేశం ప్రాథమికంగా భౌగోళిక యూనిట్‌గా మొదలవుతుంది. వివిధ భౌగోళిక ప్రాంతాల మధ్య నిర్దిష్టంగా స్పష్టంగా గుర్తించగలిగిన సంస్కృతి, ఆచార వ్యవహారాలూ భాషలూ ఇతర ప్రమాణాలుగా ఉంటాయి. అందువల్లనే ఉన్నత పాఠశాల స్థాయిలో రాజ్యం గురించిన పరిచయ పాఠ్యాంశాల్లో రాజ్యానికి ఉండాల్సిన ప్రాథమిక లక్షణాలు - ప్రభుత్వం, భాష, ప్రజలు, నిర్దిష్టమైన సరిహద్దులు - అని నిర్వచించారే తప్ప మరే ప్రమాణం గురించీ ప్రస్తావించలేదు. అదేవిధంగా సాంఘిక శాస్త్రాల అధ్యయనంలో ప్రభుత్వాలు (ప్రభుత్వానికి నాయకత్వం వహిస్తున్న వారి) అనుసరించే విధి విధానాలు పద్ధతులు ప్రాతిపదికన రాజ్యాలను నాల్గు తరగతులుగా విభజించారు. అవి కూడా నియంతృత్వ రాజ్య వ్యవస్థలు, పోలీసు రాజ్యం, సంక్షేమ రాజ్య, సోషలిస్టు రాజ్య వ్యవస్థలుగా చెప్పుకుంటున్నాము. వీటిలో ఎక్కడా రాజ్య వ్యవస్థలను మతాల ప్రాతిపదికన, సంకుచిత లక్ష్యాల కోసం రూపొందించిన నిర్వచనాల ప్రాతిపదికన నిర్వచించలేదు. 19వ శతాబ్దం ముగింపు నాటికి లౌకిక నిర్వచనం ప్రకారమే జాతీయతను నిర్దారించటం ప్రమాణంగా ఉంది. పాశ్చాత్య దేశాలన్నీ పైన చెప్పిన నాలుగు లక్షణాల ప్రాతిపదికనే సరిహద్దులు విభజితం అయినట్టు యూరోపియన్‌ దేశాల చరిత్ర మనకు విదితం చేస్తుంది.

యూరోపియన్‌ జాతీయవాదం పెట్టుబడిదారీ వ్యవస్థ విస్తరణతో పాటు సంఘటితం అవుతూ వచ్చింది. దేశంలో ఉన్న అంతర్గత శతృవును గుర్తించి వారిని అస్థిత్వపరంగా రాజకీయంగా సైద్ధాంతికంగా ఒంటరిపాటు చేసే క్రమంలో యూరోపియన్‌ జాతీయత క్రోడీకరించబడింది. ఈ క్రమంలోనే పెట్టుబడిదారీ దేశాలు తమ మార్కెట్‌ అవసరాలు తీర్చుకునే నేపథ్యంలో వలసవాదాన్ని ఆశ్రయించటంతో జాతీయతకు సరికొత్త వ్యాఖ్యానం తెరమీదకు వచ్చింది. వర్ధమాన దేశాల్లో తెరమీదకు వచ్చిన జాతీయభావాలు బాహ్య శతృవుకు వ్యతిరేకంగా అంతర్గతంగా వైవిధ్య భరితమైన ప్రజా సమూహాలను ఏకం చేసే క్రమంలో ముందుకొచ్చిన జాతీయత. ఈ విధంగా చూసినపుడు యూరోపియన్‌ జాతీయ నిర్దిష్ట వర్గాలను, సామాజిక తరగతులను, మత విశ్వాసాలను వెలివేసింది (ఎక్స్‌క్లూజివ్‌) జాతీయత కాగా వర్ధమాన దేశాల జాతీయత సకల సామాజిక తరగతులు, మత విశ్వాసాలు, వర్గాలను సంలీనం చేసుకునే (ఇన్‌క్లూజివ్‌) జాతీయత అన్న ప్రాథమిక వ్యత్యాసాన్ని అర్థం చేసుకోవాల్సి ఉంది. యూరోపియన్‌ దేశాల్లో పెల్లుబుకిన జాతీయత ఆయా దేశాలను పదేపదే విచ్ఛిన్నం చేస్తూ పునరేకీకరణ గావిస్తూ షుమారు రెండు వందల ఏండ్ల రక్తసిక్త యూరప్‌కు తెరతీసింది. దీనికి భిన్నంగా వర్ధమాన దేశాల్లో సంఘటితమైన జాతీయత సుమారు వందేండ్ల వర్తమాన చరిత్రలో శాంతియుత సహజీవనానికి పునాదులు వేసింది. ఆధునిక ప్రపంచ చరిత్రలో ఇంత దీర్ఘకాలం వర్థమాన దేశాల్లో అంతర్గత శాంతియుత పరిస్థితులు కొనసాగటం ఇదే ప్రథమమం అని చెప్పటం అతిశయోక్తి కాదు.

భారత రాజ్యాంగం, భారత జాతీయత రెండూ స్వాతంత్య్రోద్యమ పోరాట నేపథ్యంలో రాటుదేలిన వైవిధ్య భరితమైన రాజకీయ సామాజిక మేధోమధనం ఫలితం. యూరోపియన్‌ జాతీయత సంఘటితమయ్యే క్రమంలో పాలకవర్గాలు, మార్కెట్‌ కీలక పాత్ర పోషిస్తే భారత జాతీయ సంఘటితం కావటంలో ప్రజలు, ప్రజా పోరాటాలు, ప్రత్యేకించి పెట్టుబడిదారీ వ్యవస్థ అంశంగా మారిన వలసవాదానికి వ్యతిరేకంగా వెల్లువెత్తిన ప్రజా పోరాటాలు కీలక పాత్ర పోషించాయి. ఈ ప్రజా పోరాటాలు దేశ రాజకీయ వ్యవస్థ ముందు ఉంచిన ఆశలు, ఆశయాలు, లక్ష్యాల సాధనతో పాటు యూరోపియన్‌ తరహా జాతీయతకు భిన్నంగా విలక్షణమైన సమ్మిళితమైన భారత జాతీయతను పాలకవర్గాలు అంగీకరించాల్సిన పరిస్థితి కల్పించింది. భారత రాజ్యాంగం కొన్ని మౌలిక విషయాలను ప్రత్యేకించి నిర్వచించకుండా వదిలేసింది. జాతీయత అంటే ఏమిటి? ఇండియా దట్‌ ఈజ్‌ భారత్‌ అన్న పదబంధం అటువంటి మౌలిక విషయాల్లో ఒకటి. అంతమాత్రాన రాజ్యాంగ పరిషత్‌ ఈ అంశాలను తడమలేదు అనుకుంటే పొరపాటు. అప్పటికే సర్వాంగీకృత అభిప్రాయాలను వ్యక్తీకరించేవిగా ఈ పదబంధాలు ఉన్నందున వాటి గురించి ప్రత్యేకంగా చర్చించలేదు. కానీ వాటిని విపులీకరిస్తూ వివిధ అధికరణాల్లో ప్రస్తావనలు వదిలారు.
భారత భూభాగంపై జన్మించి నివశిస్తున్న పౌరులందరు భారతీయులే అని పౌరసత్వాన్ని ధృవీకరించింది. తద్వారా భారత జాతీయత భారత దేశంలో నివశించే వారందరి ఉమ్మడి జాతీయత పర్యవసానం అని చెప్పకనే చెప్పింది. అంతేకాదు. దేశంలో నివసిస్తున్న వైవిధ్యభరితమైన సామాజిక ఆర్థిక తరగతులు, మత విశ్వాసాలకు చెందిన వారిని గుర్తించటమే కాక వారి అస్థిత్వాన్ని రాజ్యాంగం అంగీకరించింది. అందువల్లనే అటువంటి బలహీనులైన తరగతులందరికీ అవసరమైన రక్షణలు కూడా కల్పించాలని, స్వాతంత్య్రోద్యమ పర్యవసానంగా సంఘటితమైన భారత జాతీయతను కాపాడుకోవాలంటే స్వాతంత్య్రోద్యమంలో పాల్గొన్న అన్ని తరగతుల ప్రజల మనోభావాలు, ఆశలు, ఆశయాలు నెరవేర్చుకునేందుకు రాజ్యాంగం ద్వారా కనీస హామీ ఇవ్వాలని రాజ్యాంగ పరిషత్‌ నిర్ణయించింది. అందువల్ల భారత రాజ్యాంగంలో ప్రస్తావన లేని కోణాలు భారత జాతీయతలోనూ లేవు. స్వతంత్ర భారతదేశం ఎన్నో వేర్పాటువాద ఉద్యమాలను తట్టుకుని అధిగమించి జాతీయ సమైక్యతా సమగ్రతలను కాపాడుకుంటూ తన ఉనికిని కొనసాగించుకుంటూ వచ్చింది. రాజ్యాంగం ఆరెస్సెస్‌ కోరుకుంటున్న మనువాద వ్యవస్థ, కుల వ్యవస్థను తిరుగులేని విధంగా దెబ్బ తీసింది.

కుల వ్యత్యాసాలు, మత విశ్వాసాలతో నిమిత్తం లేకుండా రాజ్యంగం భారతదేశంలో జన్మించిన వారందరికీ సమాన హక్కులు, అవకాశాలు, ఓటింగ్‌ హక్కులు ప్రసాదించింది. ఇటువంటి పరిమిత ప్రజాప్రాతినిధ్య వ్యవస్థ స్థానంలో సార్వత్రిక ఓటుహక్కును మొదటిగా అందరికీ అందించింది ఫ్రెంచి విప్లవం. ఈ విప్లవం స్ఫూర్తిగా నాటి వలస దేశాలన్నింటిలోనూ ఈ నినాదం పోరాట నినాదంగా మారింది. ఫ్రాన్స్‌, అమెరికా వంటి దేశాల్లో సార్వత్రిక ఓటు హక్కు 1960 దశకం నాటికి గానీ చట్టబద్ధం కాని పరిస్థితుల్లో భారత రాజ్యాంగం 1947 నాటికే సార్వత్రిక ఓటు హక్కును రాజ్యాంగ బద్ధం చేసింది. ఈ విధంగా సార్వత్రిక ఓటు హక్కు ఇవ్వటాన్ని నాడే ఆరెస్సెస్‌ వ్యతిరేకించింది. కుల మత ప్రాంత విద్వేషాలతో దేశాన్ని రక్తసిక్తం చేసే మనువాద సంస్కృతినే జాతీయతగా దేశం మీద రుద్దేందుకు శతాబ్ద కాలం నుంచీ ప్రయత్నిస్తూనే ఉంది.
అటువంటి సంఘపరివారం స్వదేశీ ముసుగులో భారతదేశాన్ని యూరోపియన్‌ దేశాల తరహాలో ఉన్మాదపూరిత జాతీయతవైపు నెడుతున్న వాస్తవాన్ని గత ఐదేండ్లలో జరిగిన పరిణామాలు రుజువు చేస్తున్నాయి. దేశీయంగా రూపొందిన జాతీయత పునాదులు సంఘపరివారానికి అక్కర్లేదు. విదేశీ నమూనాలో ఉన్న ఉన్మాద భరిత జాతీయతే దానికి ముద్దు. అందుకే సమీకృత, ప్రజాతంత్ర భారత జాతీయతను కాపాడేందుకు కంకణ బద్ధులైన వారంతా ఈ ఎన్నికల్లో ఉన్మాద జాతీయవాదానికి ప్రతినిధులుగా ఉన్న బీజేపీ, దాని మిత్రులను ఓడించటం జాతీయ కర్తవ్యంగా ఎంచుకోవాలి.
 

 

Mar 26,2019 

http://www.navatelangana.com/article/net-vyaasam/783962

ఏది భారత జాతీయత ?

మెజారిటీ హిందూత్వమే భారతీయ జాతీయత అన్న తప్పుడు ప్రచారాన్ని తిప్పి కొట్టాలంటే స్వాతంత్య్రోద్యమం నిజమైన ప్రజాతంత్ర ఉద్యమంగా పరిణామం చెందిన తీరును అర్థం చేసుకోవాలి. ప్రజాతంత్రీకరణ కోణంలో చూసినపుడు భారత స్వాతంత్య్రోద్యమ పోరాట చరిత్రను మూడు భాగాలుగా విభజించవచ్చు. ఇక్కడ ప్రజాతంత్ర స్వభావాన్ని పోరాటంలో ప్రజల భాగస్వామ్యం ప్రాతిపదికగా విశ్లేషిస్తున్నాం. విస్తృత ప్రజా బాహుళ్యం భాగస్వామ్యం ఉన్న అసంఘటిత పోరాటాల దశ మొదటిది. ఈస్టిండియా కంపెనీ ప్రారంభించిన భూసంస్కరణలకు వ్యతిరేకంగా దేశవ్యాప్తంగా వేర్వేరు ప్రాంతాల్లో వేర్వేరు సమయాల్లో చెలరేగిన సమరశీల పోరాటాలు, ఫకీర్ల తిరుగుబాటు నుంచి ప్రధమ స్వాతంత్య్ర సంగ్రామం వరకూ ఉన్న కాలాన్ని ఈ తొలిదశగా నిర్దారించుకోవచ్చు.
                 ప్రజల భాగస్వామ్యం తక్కువగా ఉండి సంఘటిత ప్రయత్నాలు, పోరాటాలు సాగిన కాలం రెండోది. ప్రధానంగా ఈ దశ ప్రధమ స్వాతంత్య్ర సంగ్రామం తర్వాతి కాలంలో ముఖ్యంగా ఎ ఒ హ్యూమ్‌ సమన్వయ సహకారాలతో కాంగ్రెస్‌ పార్టీ ప్రారంభించింది మొదలు మహాత్మాగాంధీ భారతదేశానికి తిరిగి వచ్చే వరకు ఉన్న కాలాన్ని ఈ రెండో దశ కింద చూడొచ్చు. ఈ కాలంలోనే జాతీయవాదానికి సైద్ధాంతిక జవసత్వాలు చేకూర్చే ప్రయత్నం జరిగింది. రెండు మార్గాల్లో ఇది జరిగింది. ఇంగ్లాండ్‌ పార్లమెంట్‌లో సభ్యులుగా ఉన్న గ్రాండ్‌ ఓల్డ్‌ మాన్‌ ఆఫ్‌ ఇండియా, దాదాబాయి నౌరోజి, గోపాలకృష్ణ గోఖలే వంటి వారు ఆర్థిక కోణంలో భారతదేశం గురించిన చర్చను ముందుకు తేవడం మొదటి కృషి. కమ్యూనిస్టు కుట్రలుగా బ్రిటిష్‌ నిఘా నివేదికల్లో చోటుచేసుకున్న లాహౌర్‌, మీరట్‌, కాన్పూర్‌ కుట్ర కేసులుగా నమోదైన పోరాటాలు, ఆ సందర్భంగా జరిగిన చర్చల్లో భారత జాతీయతకు సంబంధించిన ప్రత్యామ్నాయ కోణాన్ని ముందుకు తెచ్చిన రెండో మార్గం. స్వాతంత్య్ర పోరాటంలో ఈ కుట్ర కేసుల సందర్భంగా సాగిన సైద్ధాంతిక మేథోమథనం మరెన్నడూ లేదు. అప్పటికి స్వాతంత్య్రోద్య మానికి తిరుగులేని నాయకుడుగా ఉన్న కాంగ్రెస్‌ ఈ కుట్రకేసులు తెరమీదకు తెచ్చిన అంశాలను కాదనలేక క్రమంగా తన ఎజెండాలోకి తీసుకొచ్చింది. చివరి దశ సంఘటిత ప్రయత్నాలతోపాటు విశాల జనబాహుళ్యం స్వాంత్రోద్యమంలో భాగస్వాములు అయిన దశగా చెప్పుకోవచ్చు. ఇది స్వాతంత్య్ర పోరాటంలో నిర్ణయాత్మక దశ. లాహౌర్‌, మీరట్‌, కాన్పూర్‌ కుట్ర కేసుల విచారణ సందర్భంగా తమ వాదనలు వినిపించిన వారు నేడు జేఎన్‌యూలో చరిత్ర విభాగంలో పరిశోధకులుగా దరఖాస్తు చేసుకుంటే ప్రవేశం తిరస్కరించగలిగే ధైర్యం నేడు ఎవ్వరికీ లేదని ప్రముఖ చరిత్రకారిణి మృదులా ముఖర్జీ తాజాగా వ్యాఖ్యానించారంటే వారి వాదనల పటిమ, శాస్త్రీయత, చారిత్రక స్థాయి ఏమిటో అర్థమవుతుంది.

                  ఈ మూడు దశల్లోనూ తనదైన పాత్ర పోషించింది నాటి కాంగ్రెస్‌ పార్టీ. చివరి రెండుదశల్లో ప్రభావవంతమైన పాత్ర పోషించింది జాతీయ కమ్యూనిస్టు ఉద్యమం. అందువల్లే భావసారూప్యత రీత్యా స్వాతంత్రోద్యమం తొలిదశలో జరిగిన పోరాటాల స్ఫూర్తీ కొనసాగిస్తామని భారతకమ్యూనిస్టు పార్టీ (మార్కిస్టు) తమ తాజాపర్చిన కార్యక్రమంలో తెలిపింది. కాంగ్రెస్‌పార్టీ తన వ్యవస్థాపక లక్ష్యాలకు కట్టుబడి ఉన్నట్టు నేటికీ చెబుతోంది. కానీ భారత స్వాతంత్య్ర పోరాటంతో కానీ, పోరాట వారసత్వంతో కానీ ఏ మాత్రం సంబంధం లేని పార్టీ నేటి బీజేపీ. దానికి మాతృక రాష్ట్రీయ స్వయం సేవక్‌ సంఫ్‌. స్వాతంత్య్రోద్యమ పోరాటంలో బలిదానం చేసిన అమరులను అటు నాటి కాంగ్రెస్‌ గానీ, నేటి కమ్యూనిస్టు ఉద్యమం గానీ వేలసంఖ్యలో పేర్లతో సహా ప్రస్తావించే సత్తా కలిగి ఉన్నాయి. స్వాతంత్య్రోద్యమంలో త్యాగాలు చేసి బ్రిటిష్‌ జైళ్లల్లో మగ్గటం ద్వారానో, పోరాటపథంలో అసువులు బాశారనో చెప్పుకోవటానికి వీలైన పేర్లు ఆరెస్సెస్‌కు లేవు. ఆరెస్సెస్‌కు స్వాతంత్య్రోద్యమానికి ఉన్న ఏకైక లింకు వినాయక దామోదర్‌ సావర్కార్‌. ఆయన్ను పూనేలో అరెస్టు చేసి అండమాన్‌ జైలుకు పంపితే ఈ జైలు నుంచి విడుదల చేయమని బ్రిటిషోళ్ల కాళ్లా వేళ్లా పడ్డాడని ఆరెస్సెస్‌ పట్ల సానుభూతి కలిగిన చరిత్రకారులే ధృవీకరించారు. స్వాతంత్య్రం నా జన్మ హక్కు అని ప్రకటించిందుకు బాలగంగాధర తిలక్‌ను రాజద్రోహం నేరం మీద అండమాన్‌ జైలుకు పంపితే నాటి బొంబాయి నగరం నిరసనలతో స్తంభించింది. పూనేలో ప్లేగు వ్యాపించిన సందర్భంలో బ్రిటిష్‌ అధికారుల హత్యకు ప్రయత్నించినందుకు సావర్కర్‌ను అండమాన్‌ జైలుకు పంపితే ఆయన గురించి చెప్పుకునే నాధుడే కరువయ్యాడు. ఆరెస్సెస్‌ ఆద్యుల్లో ఒకరని చెప్పుకుంటున్న సావర్కర్‌కు ఉన్న నాడున్న ప్రజాదరణదీ...

                       భారత్‌లో కమ్యూనిస్టు ఉద్యమం ఊపిరి పోసుకోవటానికి ముందే దేశ రాజకీయ రంగస్థలంలో ఆరంగేట్రం చేసి ఆర్‌ఎస్‌ఎస్‌కు స్వాతంత్య్రోద్యమంలో ప్రత్యక్షంగా పాల్గొనే మాట అటుంచి స్వాతత్య్రోద్యమానికి, దాని లక్ష్యాలకు, ప్రజల ఆశలు, ఆశయాలకు పూర్తి వ్యతిరేకంగా పని చేసింది. ప్రత్యక్షంగా బ్రిటిష్‌ ప్రభుత్వానికి తొత్తుగా పని చేసింది. స్వాతంత్య్రోద్యమ లక్ష్యాలకు వ్యతిరేకంగా ఆరెస్సెస్‌ దాని అనుబంధ సంఘాలూ పని చేయటం ఈనాటిది కాదు. జాతీయ పతాకగా త్రివర్ణ పతాకాన్ని నాటి స్వాతంత్రోద్యమం ముక్తకంఠంతో అంగీకరించింది. అదే పతాకాన్ని స్వాతంత్య్రానంతరం అధికారికంగా జాతీయ పతాకగా దేశం అంగీకరించింది. కానీ ఈ పతాకలో వ్యవసాయాభివృద్ధికి ప్రాతినిధ్యం వహించే హరిత వర్ణం పరోక్షంగా ఇస్లాం సంస్కృతికి ప్రాతినిధ్యంవహించేదిగా ఉన్నందున త్రివర్ణపతాకాన్ని జాతీయ పతాకగా తొలగించాలని 1947లోనే ఆరెస్సెస్‌ అధికారిక పత్రిక ఆర్గనైజర్‌ డిమాండ్‌ చేసింది. రాజ్యాంగం ప్రతిపాదించిన పలు అంశాలు, అందించిన విలువలకు వ్యతిరేకంగా కుహనా వాదనలు ముందుకు తేవటం ఆరెస్సెస్‌ పుట్టుకతో నేర్చిన కుటిల విద్య. స్వాతంత్య్రానంతరం భారత సమీకృత (ఇన్‌క్లూజివ్‌) జాతీయతకు ఈశాన్య భారతంలోనూ, పంజాబ్‌లోనూ, జమ్ము కాశ్మీర్‌లోనూ తెరమీదకు వచ్చిన సమరశీల వేర్పాటువాద ఉద్యమాలు సవాలు విసిరాయి. సవాలును స్వీకరించింది జాతీయ సమైక్యత సమగ్రతల కోసం వేలాదిమంది కార్యకర్తలను ఫణంగా పెట్టి పోరాడిందీ భారత కమ్యూనిస్టు పార్టీ( మార్క్సిస్టు) మాత్రమే. ఈ విచ్ఛిన్నకర ఉద్యమాలు పతాక స్థాయిలో కొనసాగు తున్నపుడు, దేశాన్ని అస్థిరత్వం వైపు నెట్టిన సమయంలో నేడు భారత జాతీయత ప్రమాదపుటంచున ఉన్నది అని ఘోషిస్తున్న పార్టీ నేతలెవ్వరూ నోరెత్తలేదు. వేర్పాటువాద ఉద్యమాలను చట్టసభల్లోనూ, బయటా విధానపరంగానైనా వ్యతిరేకించలేదు. ఎందుకంటే ఆరెస్సెస్‌ కోరుకుంటున్న భారత్‌ నేటి భాషా ప్రయుక్త రాష్ట్రాలుగా విభజితమైన భారతదేశం కాదు. 1947కు పూర్వం ఉన్న 560పైగా సంస్థానాలు, జమీందార్ల పాలనలో ఉన్నట్టుగా ఆధునిక భారతదేశం సాధ్యమైనంత చిన్నచిన్న రాష్ట్రాలుగా చీల్చాలన్నది ఆరెస్సెస్‌ ప్రతిపాదన.
(తరువాయి రేపటి సంచికలో) 

 

Mar 27,2019 

http://www.navatelangana.com/article/net-vyaasam/784512

ఏది భారత జాతీయత?

(నిన్నటి సంచిక తరువాయి)
స్వాతంత్య్రోద్యమంలో భాగంగా ప్రజాతంత్ర జాతీయవాదానికి పునాదులు వేసిన మరో మైలురాయి భాషా ప్రయుక్త రాష్ట్రాల ఉద్యమాలు. యిప్పుడు చెప్పుకున్న దశల్లో చివరి దశలో తెరమీదకు వచ్చిన ఈ ఉద్యమాలు అవిభక్త బెంగాల్‌ నుంచి ఒరిస్సాను వేరు చేయటంతో ప్రారంభమై రాష్ట్రాల పునర్వవ్యవస్థీకరణ సంఘం సిఫార్సులకు అనుగుణంగా స్వతంత్ర భారతంలో భాషా ప్రయుక్త రాష్ట్రాల ఏర్పాటుతో ముగిసాయి. నాటి నుండీ నేటి వరకు కొనసాగుతున్న ఆర్‌ఎస్‌ఎస్‌కు గానీ, స్వాతంత్య్రానంతరం ఆరెస్సెస్‌ రాజకీయ విభాగాలుగా తెరమీదకు వచ్చిన జనసంఫ్‌ుకు గానీ, నేటి బీజేపీకి గానీ ఈ ఉద్యమాలతో ఏ మాత్రం సంబంధం లేదు. స్వాతంత్రోద్యమ పోరాటంలో మరో కీలక కోణం కూడా ఉంది. నాడు పోరాటం విదేశీ పాలకులకు వ్యతిరేకంగా సాగింది. దేశీయ ఆర్థిక వనరుల మీద వారి పెత్తనానికి వ్యతిరేకంగా సాగిన పోరాటం. జాతీయ వనరుల మీద ఈ దేశ ప్రజలందరికీ సమాన హక్కు కోసం జరిగిన పోరాటం. ఈ పోరాటంలోనే జాతీయత అన్న భావనలో ప్రజలు, వారి ఆర్థిక అవసరాలు, వనరులపై ప్రజల ఆధిపత్యం ఇమిడి ఉన్నాయి.
సమీకృత, సమ్మిళిత భారతీయ జాతీయతకు ఆర్థిక పునాదులు వేసిన స్వాతంత్య్రోద్యమ స్పూర్తిని, ఆ స్ఫూర్తిని కాగడాల పట్టి నిలిపిన మహౌన్నతుల త్యాగాలను తృణీకరిస్తూ నేటి ఆరెస్సెస్‌, బీజేపీ భక్తులు ముందుకు తీసుకొస్తున్నది కుహనా భారత జాతీయత. అంబేద్కర్‌, గాంధీ, నెహ్రూ, మౌలానా ఆజాద్‌, భగత్‌సింగ్‌ వంటి నేతల త్యాగాలతో స్ఫూర్తి పెనవేసుకుపోయింది. అందుకే ఈ స్వాతంత్య్రోద్యమ సేనానులను దూషించి, తూలనాడి, తృణీకరించి, బహిరంగంగా అవమానపరిస్తే తప్ప వారితో పాటు పెనవేసుకుపోయిన జాతీయతా భావాన్ని తప్పుపట్టడం సాధ్యం కాదు. నెహ్రూని ఏకంగా హిందూస్థాన్‌ని దోచుకున్న బందిపోటు ముఠా నాయకుడు అని బీజేపీ అధికార ప్రతినిధి సంబిత్‌ పాత్ర టీవీ చర్చలో వ్యాఖ్యానించినా మందలించిన పాపాన పోలేదు బీజేపీ నాయకత్వం. తాజాగా అరుణ్‌ జైట్లీ నెహ్రూవల్లనే భారతదేశానికి దక్కాల్సిన ఐక్యరాజ్యసమితి భద్రతా మండలి శాశ్వత సభ్యత్వం చైనా తన్నుకుపోయిందని వ్యాఖ్యానించటం కూడా ఇందులో భాగమే.

ప్రపంచీకరణ, ఆర్థిక సంస్కరణల పేరుతో తిరిగి దేశాన్ని ఆర్థిక సామ్రాజ్యవాద శక్తులకు కుదవపెట్టేందుకు జరిగే ప్రయత్నాలను ప్రతిఘటించే ఉద్యమాలను బలహీనం చేసే కుట్రపూరిత ప్రయత్నమే భారత జాతీయత అంటే కేవలం హిందూ జాతీయత అని చెప్పడం. ఈ దేశంలో మిగిలిన సామాజిక, ధార్మిక తరగతులను దేశం నుంచి జాతీయ ఆర్థిక జీవన స్రవంతి నుంచి వెలివేస్తేనే ఇది సాధ్యమవుతుందన్నది వీరి భావన! ఈ విధంగా దేశంలో వివిధ మత విశ్వాసాలకు చెందిన వారిని, రాజకీయ ప్రత్యర్థులను, అంతర్గత ప్రత్యర్థులను దేశద్రోహులుగా ముద్ర వేసుకుంటూ పోతే చివరకు ప్రభుత్వమే దేశం, ప్రభుత్వానికి నాయకత్వం వహిస్తున్న పార్టీయే దేశంగా మారటం, చిట్టచివరకు సదరు పార్టీనాయకుడే దేశంగా మారుతుందని నియంతృత్వాల చరిత్ర నిర్ధారిస్తుంది. ఈ క్రమంలోనే ఏకంగా మోడీ దైవాంశ సంభూతుడన్న నాటి కేంద్రమంత్రి వెంకయ్య నాయుడు వ్యాఖ్యలను గమనించవచ్చు. ఇంతకు ముందు చెప్పినట్టు ప్రభుత్వమే దేశం, ప్రభుత్వ వ్యతిరేకతే దేశ వ్యతిరేకత అని ఆరెస్సెస్‌ మందీ మార్బలం సాగిస్తున్న ప్రచారం చివరకు ప్రభుత్వానికి నాయకత్వం వహిసుస్తన్న పార్టీయే ప్రభుత్వం అన్న స్థాయికి పార్లమెంటరీ ప్రజాస్వామ్యాన్ని దిగజారుస్తోంది.

ఈ క్రమంలో సదరు ప్రభుత్వానికి నాయకత్వం వహించే పార్టీ సిద్ధాంతాలను, వివిధ సామాజిక ఆర్థిక సాంస్కృతిక వ్యవహారాలపై వారి అభిప్రాయాలను ప్రశ్నించటం, తిరస్కరించటం అంతిమంగా దేశద్రోహంగా మారే విపరీత పరిస్థితి సృష్టించింది. ఇక్కడ పాఠకులు, పాలకులు ఒక విషయాన్ని గుర్తు పెట్టుకోవాలి. భారత రాజ్యాంగం ప్రపంచ దేశాల్లోకల్లా అత్యంత ప్రజాతంత్ర రాజ్యాంగం. ఎందుకంటే రాజ్యాంగ పీఠిక భారతీయులమైన మేము భారత దేశాన్ని సర్వ సత్తాక ప్రజాతంత్ర లౌకిక సామ్యవాద గణతంత్ర రాజ్యంగా ప్రకటిస్తున్నాము అని చెప్పటం ద్వారా ఇక్కడ ప్రతి ఒక్క భారతీయుడు రాజ్యాంగ నిర్మాతగా మారాడు. గత ఆరు దశాబ్దాల్లో వివిధ సందర్భాల్లో రాజ్యాంగ పీఠిక రాజ్యాంగ మౌలిక లక్షణాల్లో ఒకటి అని సుప్రీం కోర్టు రాజ్యాంగ ధర్మాసనం పదే పదే గుర్తు చేస్తూనే వచ్చింది. ఈ రాజ్యాంగం, తద్వారా సంక్రమించిన అధికారాలను వినియోగించే న్యాయవ్యవస్థనే గుర్తించ నిరాకరిస్తున్న సంఘ పరివారం ప్రభుత్వంపై సంపూర్ణ ఆధిపత్యం చెలాయించే అవకాశం కల్పించటం భారత రాజ్యాంగంలోని ప్రజాతంత్ర స్వభావానికి తాజా ఉదాహరణ.
మోడీ కేబినెట్‌లో పలువురు ఆరెస్సెస్‌ యూనిఫారం ధరించటం మానేశారు తప్ప ఆరెస్సెస్‌ మౌలిక లక్ష్యాలను మక్కికి మక్కీ అమలు చేస్తున్నారు. అటువంటి వారి చేతుల్లో రాజ్యాంగయంత్రం నేడు బందీ అయ్యింది. ఈ రాజ్యాంగ యంత్రం దేశ వాసులందరికీ సమాన హక్కులు అవకాశాలు కల్పించాల్సిన బాధ్యత నుంచి నిర్దిష్ట సామాజిక సమూహాలకు దేశ వనరులు, అవకాశాలు, హక్కులను దఖలు పరుస్తూ మిగిలిన వారిని ద్వితీయశ్రేణి పౌరులుగా మార్చేందుకు బాహాటంగానే కృషి చేస్తోంది. బీజేపీ చేస్తున్న విధ్వంసం కేవలం దేశంలో జాతీయవాద భావాలు తగ్గినందువల్ల దాన్ని పెంపొందించటానికి చేస్తున్న ప్రయత్నంగా చెప్పబూనుకోవటం విడ్డూరం. నిజమైన జాతీయవాదం, రాజ్యాంగ నిర్మిత జాతీయవాదానికి తూట్లుపొడవటానికి జరుగుతున్న ప్రయత్నమే తప్ప మరోటి కాదు అన్న విషయాన్ని అర్థం చేసుకోవటంలో విఫలమైతే స్వాతంత్య్రో ద్యమం ప్రజాతంత్ర లక్ష్యాలు ఆశయాలకు ప్రాతనిధ్యం వహిస్తూ నిర్మితమైన పలు రాజ్యాంగ వ్యవస్థలకు ఆరెస్సెస్‌ భావజాల ప్రేరేపిత ప్రభుత్వం తెచ్చిపెడుతున్న ముప్పు పట్ల ఏమరుపాటు వహించిన వాళ్లమే అవుతాము.

ప్రపంచ దేశాల రాజ్యాంగాల్లో వ్యక్తి స్వేచ్ఛకు సంబంధించి, సామాజిక అభివృద్ధికి సంబంధించిన అత్యంత పురోగామి భావాలను రాజ్యాంగ బద్ధమైన హక్కులు, అవకాశాలు, బాధ్యతలు, విధులు కింద మార్చటంలో రాజ్యాంగ రచనా సంఘం అధ్యక్షులు బిఆర్‌ అంబేద్కర్‌ పాత్ర అద్వితీయం. రాజ్యాంగం ప్రతిపాదించిన ఇటువంటి అనేక అవకాశాలు ప్రజాతంత్ర జాతీయతను పరిపుష్టం చేశాయి. నేడు జాతీయత పేరుతో ఆరెస్సెస్‌ ముందుకు తెస్తున్న వాదనలన్నీ ఈ రాజ్యాంగ మౌలిక సూత్రాలకు వ్యతిరేకంగా ముందుకు వస్తున్నాయి. రాజ్యాంగ బద్ధంగా పరిపాలన సాగిస్తామని రాష్ట్రపతి ముందు ప్రమాణం చేసిన ప్రభుత్వం రాజ్యాంగ విరుద్ధమైన దాడికి నాయకత్వం వహించటం దేశాధ్యక్షుడుగా ఉన్న హిట్లరే స్వయంగా జర్మనీ పార్లమెంట్‌కు నిప్పంటించే కుట్రకు వ్యూహం పన్నిన సందర్భాన్ని గుర్తుకు తెస్తుంది. రష్యాలో గోర్బచేవ్‌ నాయకత్వంలో విప్లవ రష్యా రాజ్యాంగాన్ని, విప్లవ పతాకాన్ని, పార్టీని, పార్టీ కార్యక్రమాన్ని రద్దు చేసి జార్‌ కాలం నాటి చిహ్నాలను చట్టబద్ధం చేసిన సందర్భంతోనూ మోడీ పాలనకు పోలికలున్నాయి. అదికూడా బిఆర్‌ అంబేద్కర్‌ 125వ జయంతి ఉత్సవాల సందర్భంగా పార్లమెంట్‌ ప్రత్యేక సమావేశాలు ఏర్పాటు చేసి ఆయనకు మొక్కుబడిగా నీరాజనాలు పలుకుతూ మరోవైపు ఆయన అందించిన రాజ్యాంగంలోని ప్రజాతంత్రయుతమైన హక్కులను 'హిందూ'మహా సముద్రంలో నిమజ్జనం చేయటానికి పాచికలు వేస్తోంది ఆరెస్సెస్‌. ఆరెస్సెస్‌ శకుని తరహాలో ఆడిస్తున్న పాచికలాటను దుర్యోధనుడు ఆడినట్టుగా మోడీ, కౌరవ సమూహంలా ఆయన మంత్రివర్గంలోని హేమా హేమీలు ఆడుతున్నారు. నాటి మహాభారతంలో ద్రౌపది వస్త్రాపహరణానికి గురైతే నేటి భారతంలో రాజ్యాంగంలోని ప్రజాతంత్ర హక్కులు వస్త్రాపహరణానికి గురవుతున్నాయి.
ఈ పరిస్థితుల్లో డాక్టర్‌ అంబేద్కర్‌ ఆశయాల పరిరక్షణకు పాటుపడటం అంటే అంబేద్కర్‌ విరచిత రాజ్యాంగాన్ని, దాని ప్రజాతంత్ర స్వభావాన్ని, స్వాంత్య్రోద్యమ వారసత్వంగా అందివచ్చిన ప్రజాతంత్ర జాతీయతను కాపాడుకోవటానికి పోరాడటమే. ఇదే నిజమైన దేశభక్తుల కర్తవ్యం. జాతీయవాదం ముసుగులో రాజ్యాంగ విరచిత ప్రజాతంత్ర జాతీయత స్థానంలో ఆరెస్సెస్‌ విరచిత మతోన్మాద జాతీయతను ముందుకు తేవటానికి, అదే అసలైన జాతీయతగా చిత్రించేందుకు జరుగు తున్న కుయత్నాలను ఆమూలాగ్రం వ్యతిరేకించి పోరాడటమే నిజమైన భారతీయతకు నీరాజనం పట్టే మార్గం. ఈ సందర్భంగా స్వాతం త్యోద్యమం తోనూ, స్వాతంత్య్రోద్యమం అందించిన ప్రజాతంత్ర జాతీయవాద భావనలతోనూ ఏ మాత్రం సంబంధం లేని ఆరెస్సెస్‌ బీజేపీలు ఏ విధంగా మిథ్యా జాతీయవాదాన్ని తెరమీదకు తెస్తున్నాయో వివరించే ప్రయత్నం చేయాలి. ఆరెస్సెస్‌ కుట్రలకు అడ్డు కట్ట వేయాలి. ఈ కుట్రలకు ఆజ్యం పోస్తున్న శక్తులను గద్దె దింపాలి. దీనికి 2019 ఎన్నికలే తగిన సందర్భం.
- కొండూరు వీరయ్య
సెల్‌: 9871794037

Apr 02,2019

మారుతున్న సంఘ్‌' వ్యూహాలు.. 

http://www.navatelangana.com/article/net-vyaasam/787073

సామాజిక జీవితంపై ప్రభావంలోక్‌సభ ఎన్నికలకు గాంధీనగర్‌ లోక్‌సభ నియోజకవర్గం నుంచి లాల్‌ కిషన్‌ అద్వానీ స్థానంలో బీజేపీ అధ్యక్షుడు అమిత్‌షా నామినేషన్‌ దాఖలు చేయటంతో బీజేపీ తొలితరం నాయకత్వం పూర్తిగా తెరమరుగైంది. దాదాపు నాలుగు దశాబ్దాల పాటు పార్టీకి రాజకీయంగా సైద్ధాంతికంగా సారధ్యం వహించిన అటల్‌ బిహారీ వాజ్‌పేయి-అద్వానీ స్థానంలో అమిత్‌షా- నరేంద్రమోడీ ద్వయం పార్టీ వ్యవస్థపై సంపూర్ణ ఆధిపత్యం సంపాదించింది. ఎన్నికల ఫలితాలు ఎలా ఉన్నా పార్టీకి సారధ్యం వహించటంలో ఈ రెండు జోడీల మధ్య సాపత్య వ్యత్యాసాలు రానున్న కాలంలో చర్చనీయాంశం కానున్నాయి.
మూడున్నర దశాబ్దాలుగా పార్టీకి వాజ్‌పేయి-అద్వానీ సారధ్యం వహించిన తీరుకు గత ఐదేండ్లుగా మోడీ-షా సారధ్యం వహిస్తున్న తీరుకూ మధ్య పోలిక లేదు. మోడీ-షా ద్వయం నాయకత్వంలో రాష్ట్రీయ స్వయం సేవక్‌సంఫ్‌ు పడగ నీడ అటు పార్టీపైనా ఇటు ప్రభుత్వంపైనా మర్రి ఊడలా పర్చుకుంటోంది. 1998లో ఎన్డీయే తొలిసారి అధికారానికి రావటంతో భారత రాజకీయాల్లో హిందూత్వ ఆధిపత్య రాజకీయాలు నిర్ణయాత్మక దశకు చేరుకుంటే 2014లో మోడీ-షా ద్వయం పగ్గాలు చేపట్టాక హిందూత్వ రాజకీయాలు కాస్తా హిందూ ఉన్మాద రాజకీయాలుగా రూపాంతరం చెందాయి. రెండు దశల్లోనూ సంఘపరివారం వ్యూహాత్మకంగానే వ్యవహరిం చింది. 1998లో ఎలాగైనా అధికారాన్ని చేపట్టాలన్న లక్ష్యంతో పరివార్‌కు కీలకమైన రాజకీయ విధానాలను కూడా పక్కన పెట్టింది. 2014లో ఎలాగైనా అధికారం చేజారిపోదు అన్న ధీమా వచ్చాక మోడీ-షా ద్వయం అప్పటి వరకు పక్కన పెట్టిన విధానాలు, వ్యవహారాలు, ఎజెండాలు అన్నీ తెరమీదకు తెచ్చేసింది.
ఇప్పటి వరకు కేంద్రంలో అధికారం చేపట్టిన పార్టీలకు వచ్చిన ఓట్ల శాతంతో పోల్చి చూస్తే 2014లో బీజేపీకి మాత్రమే అతి తక్కువ ఓట్ల శాతం -31 శాతం వచ్చాయి. అంటే సంఖ్యరీత్యా పార్లమెంట్‌లో బలంగా ఉన్నా ప్రజాపునాది రీత్యా అత్యంత బలహీనమైన ప్రభుత్వంగా మోడీ ప్రభుత్వం చరిత్రలో నిలిచిపోతుంది. కానీ మోడీ పరిపాలన ప్రాధాన్యతలు దేశాన్ని మరో రెండు దశాబ్దాల వరకు ప్రభావితం చేసేవిగా ఉన్నాయి. పరిమిత ప్రజా పునాది కలిగిన ప్రభుత్వం దేశ భవిష్యత్తును అపరిమితంగా ప్రభావితం చేసే విధానాలకు తెర తీసే అధికారం కలిగి ఉందా లేదా అన్న ప్రశ్న తలెత్తుతుంది.

ఇటువంటి విధానాలన్నీ రాజకీయ సైద్ధాంతిక సాంస్కృతిక రంగంలో ఏ విధంగా ప్రభావం చూపుతాయో అర్థం చేసుకుంటే తప్ప మోడీ ప్రభుత్వాన్ని గద్దె దించాల్సిన ఆవశ్యకతను అర్థం చేసుకోలేం. మరో మాటలో చెప్పాలంటే ఆధిపత్య రాజకీయాల స్వరూప స్వభావాలను అర్థం చేసుకోలేకపోతే ప్రజాస్వామిక వ్యవస్థపై విస్తరిస్తున్న సంఘపరివారం పడగ నీడ ప్రమాదాన్ని కూడా అర్థం చేసుకోవటం సాధ్యం కాదు. ఎన్నికల్లో గెలిచిన వాళ్లే ప్రభుత్వం ఏర్పాటు చేస్తారు, ఎవరు ప్రభుత్వంలోకి వస్తే ఏమిటి అన్న ప్రశ్నతో కాలం వెళ్లబుచ్చదల్చుకున్న వారికి ఓటు కేవలం ప్రభుత్వాలను ఎన్నుకోవటం కోసం మాత్రమే కాదనీ, ప్రజల భవిష్యత్తును, దేశ భవిష్యత్తుకు దిశా నిర్దేశం చేయటంలో ఓటు కీలకపాత్ర పోషిస్తుందన్న వాస్తవాన్ని గ్రహించటంలో విఫలమవుతాము.
మోడీ పరిపాలనలో భారతీయ సమాజంలో పెరుగుతున్న మితవాద ప్రజాతంత్ర వ్యతిరేక ధోరణుల పట్ల అప్రమత్తంగా ఉండాలంటే మోడీ పాలన ప్రభావాన్ని విశ్లేషించాలి. అర్థం చేసుకోవాలి. హిందూత్వ రాజకీయాల నాందీ ప్రస్తావన నుంచి పరిశీలిస్తే తప్ప దీన్ని అర్థం చేసుకోలేము. వలసవాదంతో మొదలైన హిందూ-ముస్లిం విభజన స్వాతంత్య్రానంతరం ఏయే రూపాలు తీసుకుంది, జాతీయ రాజకీయాల్లో కేంద్ర స్థానాన్ని ఆక్రమించిన తర్వాత పరిస్థితుల గురించిన ప్రశ్న అటువంటి వాటిలో ఒకటి. ముస్లిం వేర్పాటువాదానికి ప్రతిగా హిందూ మతోన్మాదం తలెత్తిందన్న వాదన తరచూ వినిపిస్తోంది. కానీ చరిత్రను పరిశీలిస్తే ఈ వాదన సత్యదూరమని తేటతెల్లమవుతుంది. వలస పాలనలో రాష్ట్రీయ స్వయం సేవక్‌ సంఫ్‌ు ఆవిర్భÛవించిన దశాబ్దం తర్వాతే ముస్లింలీగ్‌ భారత రాజకీయాల్లో తెరమీదకు వచ్చింది. అందుకే సంఫ్‌ుపరివారానికి మొదటి శతృవు చరిత్ర. చరిత్రకారులు. చరిత్ర నుంచి పుట్టుకొచ్చిన సంస్కృతి. సాంస్కృతిక రంగ కార్యదక్షులు. దాదాపు నాలుగున్నర దశాబ్దాల బీజేపీ రాజకీయ ప్రస్థానంలో అనేక విధానపరమైన ప్రయోగాలు చేసింది. ప్రపంచ సోషలిస్టు శిబిరం పెట్టుబడిదారీ వ్యవస్థకు ప్రత్యామ్నాయంగా ఎన్ని పరిమితులతోనైనా కొనసాగుతున్న దశలో బీజేపీ వంటి పచ్చి మితవాద పార్టీ కూడా ప్రజల ముందుకు రావటానికి గాంధేయ సామ్యవాదం నినాదాన్ని స్వీకరించాల్సి వచ్చింది. బీజేపీ పూర్వావతారం భారతీయ జనసంఫ్‌ు ప్రజాస్వామ్య పరిరక్షణ ఉద్యమం పేరుతో సాగిన ఎమర్జెన్సీ వ్యతిరేక ఉద్యమంలో భాగస్వామ్యం వహించటం ద్వారా తన మతోన్మాద రాజకీయ కోణాలను జయప్రదంగా కప్పిపెట్టుకుని ప్రజల ముందుకు వచ్చింది. ఈ రెండు నినాదాలు పెద్దగా ఆరెస్సెస్‌ పరివారానికి పెద్దగా రాజకీయ ప్రాబల్యాన్ని తెచ్చిపెట్టలేక పోయాయి.

ఈ రెండు ప్రయోగాలు విఫలమయ్యాక బీజేపీ చేపట్టినదే రామమందిరం సమస్య. శతాబ్దాల తరబడి భారతీయ మానసికతలో అంతర్భాగంగా ఉన్న రాముడు, రామాయణాన్ని కుహనా చరిత్ర ఆధారంగా రాజకీయ సాధనంగా మార్చుకునే ప్రయత్నంలో భాగంగా ముందుకు వచ్చిందే అయోధ్యలో రామమందిర నిర్మాణం సమస్య. పూర్వపు రెండు ప్రయత్నాల కంటే ఈ ప్రయత్నం బీజేపీకి దాన్ని వెన్నంటి నడుపుతున్న ఆరెస్సెస్‌కు రాజకీయ ప్రాబల్యాన్ని, ప్రజామోదాన్ని తెచ్చి పెట్టింది. దీంతో రామమందిరం బీజేపీకి రాజ్యాధికార సోపానంగా మారింది. దీంతోపాటే ప్రపంచ వ్యాప్తంగా మారిన భౌగోళిక రాజకీయ వాతావరణం కూడా బీజేపీ ముస్లిం వ్యతిరేకత కాగడాను నిలిపి ఉంచటానికి దోహదం చేసింది.
2014లో మోడీ-షా ద్వయం నాయకత్వ స్థానానికి వచ్చాక హిందూత్వ రాజకీయాల సామాజిక పునాది పెరగటానికి, ప్రజామోదం పొందటానికి వీలుగా మతోన్మాద రాజకీయ చిహ్నాలు, వ్యూహాల్లో పరిణామాత్మక మార్పులు వచ్చాయి. కేవలం ధార్మిక జీవనమే కాక ప్రజా సాంస్కృతిక జీవన శైలి కూడా రాజకీయ కురుక్షేత్రంలో భాగమైంది. ఈ నేపథ్యంలో ముందుకు వచ్చినవే లవ్‌ జీహాద్‌, నవనిర్మాణ సేనలు, ఘర్‌వాపసీ క్రతువులు. వీటన్నింటికీ పరాకాష్ట గోరక్ష, మూక హత్యలు. ఈ నూతన ఎజెండా యావత్తు భారత సామాజిక జీవితాన్ని అతలాకుతలం చేసింది. మరీ ముఖ్యంగా మహిళలను నూతన ఆధిపత్య హిందూ రాజకీయాలకు కేంద్రంగా మార్చింది. ఈ విధంగా సాధారణ హిందూ మతావలంబీకులకు, హిందూమతోన్మాదులకు మధ్య ఉన్న సన్నని గీతను చెరిపేసేందుకు ఈ ఐదేండ్లల్లో జరిగిన కృషి భవిష్యత్తు భారతాన్ని మార్చటంలో బీజాక్షరాలుగా పని చేస్తాయనటం సందర్భరహితం కాబోదు.

తమ నిత్యజీవన సమస్యల పరిష్కారానికి బీజేపీ/మోడీ ప్రతిపాదించిన పరిష్కారాలను అమలు చేయాలని 2014లో ప్రజలు బీజేపీకి ఓటు వేశారు. కానీ బీజేపీ ఈ ఒక్క విషయాన్ని పక్కన పెట్టి తాను ఎంచుకున్న లక్ష్యాలను, నిర్దేశించుకున్న ఉద్దేశ్యాలతో ప్రజా జీవితాలను అతలాకుతలం చేస్తూ 21వ శతాబ్దంలో మధ్యయుగాల నాటి ప్రపంచం తిరస్కరించిన సామాజిక నిర్మాణాలను పున:ప్రతిష్టించటానికి శాయశక్తులా పని చేసింది. 2014 నాటి మోడీ పాలనకు ప్రజా పునాది పరిమితం అన్న సంగతి గుర్తెరిగారు కనకనే సామాజిక సమీకరణాల అవసరాన్ని బీజేపీ- సంఘపరివారం గుర్తించింది. వాజ్‌పేయి- అద్వానీ బీజేపీని అధికారానికి తేవటానికి రాజకీయ సంకీర్ణాలు నిర్మిస్తే మోడీ-షా ద్వయం సామాజిక సంకీర్ణాలను నిర్మిస్తోంది. రాజకీయ సంకీర్ణాలు ఐదేండ్లకొకసారి మారుతూ ఉంటాయి. కానీ సామాజిక సమీకరణాలు తరానికి ఒకసారో రెండు మూడు తరాలకు ఒకసారో మారతాయి. మోడీ-షా ద్వయం ప్రారంభించిన ఈ ప్రయత్నాలకు గండి కొట్టాలంటే 2019 ఎన్నికల్లో బీజేపీ కూటమిని ఓడించటం తప్ప మరో మార్గం లేదు. మరో రెండు మూడు తరాలను ఆధిపత్య మతోన్మాద భావజాలానికి బలి చేయకుండా ఉండాలంటే ప్రత్యామ్నాయం కోరుకునే లౌకిక ప్రజాతంత్ర శక్తులు రాజకీయంగా మతోన్మాదశక్తులను గద్దెనెక్కకుండా చూడటంతో పాటు సామాజిక సాంస్కృతిక జీవనం నుంచి మతోన్మాద శక్తులను వెలివేయాలి.
- కొండూరి వీరయ్య
సెల్‌: 9871794037

Apr 03,2019

 

http://www.navatelangana.com/article/net-vyaasam/788069

ప్రజాస్వామ్యానికి ఫేక్‌న్యూస్‌ వైరస్‌

ఎంత గొప్ప హార్డ్‌వేర్‌, సాఫ్ట్‌వేర్‌ ఉన్న కంప్యూటరైనా వైరస్‌ సోకితే ఎలా పని చేస్తుందో మనందరికీ తెలిసిందే. మరో ఉదాహరణగా చెప్పాలంటే నిలువెత్తు ఊడలమర్రి అయినా చీడ సోకితే లోలోనే తొలుచుకుపోయి నిట్టనిలువునా కుప్పకూలుతుంది. అలాంటి వైరస్‌ (చీడ) ఫేక్‌న్యూస్‌. ప్రపంచంలో అతిపెద్ద ప్రజాస్వామిక దేశాలుగా చెప్పబడుతున్న అమెరికా, భారతదేశాలు ఫేక్‌ న్యూస్‌ వైరస్‌ బారినపడ్డాయి. 2016 అమెరికా అధ్యక్ష ఎన్నికల్లో ఫేక్‌ న్యూస్‌ వైరస్‌ ఫలితాలను ప్రభావితం చేసిందని విశ్లేషణలు నిర్థారిస్తున్నాయి. భారతదేశంలో 2019 ఎన్నికల్లో చీడవార్తలు అదేతరహా పాత్ర పోషించనున్నాయన్న ఆందోళన కలుగుతోంది. ఈ రెండు దేశాల అనుభవాల్లో తేడా ఒక్కటే. అమెరికా ఎన్నికల ఫలితాలను తారుమారు చేసిన ఫేక్‌న్యూస్‌ విదేశాల్లో తయారైంది. మన దేశంలో మాత్రం 'స్వదేశీ' సృజనాత్మకత ఫలితమే.
ఏప్రిల్‌ ఒకటో తేదీన అభూతకల్పనలు ప్రచారం చేస్తున్న 702 ఫేస్‌బుక్‌ పేజీలను తొలగిస్తున్నట్టు ఫేస్‌బుక్‌ సంస్థ ప్రకటించింది. ఇలా రద్దు చేసిన పేజీల్లో ఇండియా ఐ అనే పేరుతో నడుస్తున్న పేజీకూడా ఉంది. ఈ పేజీలో వచ్చే ఫేక్‌న్యూస్‌ను రోజూ 26లక్షలమంది చూస్తున్నారు. భారతీయుల మనస్తత్వం పెదరాయుడు సినిమాలో బ్రహ్మానందం పాత్ర వంటిది. కంటికి కనిపించింది చెవికి వినిపించింది తప్పో ఒప్పో చూసుకోకుండా ప్రచారం చేయటంలో ఉన్నంత ఆనందం మరోపనిలో ఉండదు. ఇక్కడ విశేషమేమిటంటే ఈ ఇండియా ఐ అనే ఫేస్‌బుక్‌ పేజీ నడుపుతున్న కంపెనీ సిల్వర్‌ టచ్‌. ఈ కంపనీయే ప్రధానమంత్రి మోడీ వ్యక్తిగత ఫేస్‌బుక్‌ పేజీలను కూడా నడుపుతోంది. దీన్నిబట్టి సామాజిక మాధ్యమాల్లో ప్రధాని మోడీ కనుసన్నల్లో సాగుతున్న ప్రచారంలో నిజమెంతో ఫేక్‌ ఎంతో సరిచూసుకోవటం పాఠకుల వంతు.
ఈ విధంగా తప్పుడు సమాచారంతో ప్రజాభిప్రాయాన్ని తారుమారు చేసేందుకు భారత రాజకీయాలు సరికొత్త సమాచార సాంకేతిక యుద్ధానికి తెరతీశాయి. ఈ యుద్ధానికి లోక్‌సభ ఎన్నికలు వేదిక కావటం ముంచుకొస్తున్న ముప్పుకు సంకేతం. ఈ మధ్యనే 400కి పైగా ఐటీ కరసేవకులతో కూడిన బీజేపీ సోషల్‌ మీడియా సైన్యం ఓ వార్తను ప్రచారంలో పెట్టింది. వామపక్షాలు, కాంగ్రెస్‌లకు ఓటు వేయొద్దన్నది ఈ వార్త సారాంశం. పనిలో పనిగా దేశభక్తులైన హిందువులు నిరంతరం చూస్తూ ఉండాల్సిన కొన్ని యూ ట్యూబ్‌ చానళ్లు, వార్త పత్రికలు, ప్రధాన స్రవంతి టెలివిజన్‌ చానెళ్ల జాబితా కూడా ఇచ్చింది. వీటన్నింటిలో కేవలం రాజకీయ ప్రత్యర్థులపై దాడి చేయటమే కాదు. నిరసన తెలిపే స్వతంత్ర మేధావులు, ప్రభుత్వ అభిప్రాయంతో విభేదించే విశ్లేషకులు వంటి వారి మీద కూడా వ్యక్తిత్వ హననానికి పాల్పడేందుకు ఇవన్నీ వేదికలు కానున్నాయి. ముస్లింలపై సాగుతున్న ప్రచార దాడికి అంతులేదు. ఇటువంటి తప్పుడు వార్తల ప్రచారం పర్యవసానమే దేశంలో గత నాలుగేండ్లల్లో సాగుతున్న మూకహత్యలు.

ఢిల్లీ కేంద్రంగా పనిచేసే ఓ పరిశోధనా సంస్థ అభివృద్ధి చెందుతున్న సమాజాల అధ్యయన కేంద్రం (సీఎస్‌డీఎస్‌). 2016లో ఈ సంస్థ నిర్వహించిన ఓ సర్వేలో 34ఏండ్ల లోపు వయసున్న యువకులు 57శాతం మంది వారంలో కొన్ని రోజులు టీవీలు చూస్తే అంతే మోతాదులో యువకులు సమాచారం కోసం వార్తాపత్రికలపై ఆధారపడుతున్నారు. 18శాతం కేవలం ఇంటర్నెట్‌ మాధ్యమంపై ఆధారపడుతున్నారు. గూగుల్‌ సంస్థ అధ్యయనం ప్రకారం దేశంలో 23కోట్లమందికి పైగా వాట్సప్‌ ఖాతాదారులున్నారు. పనిచేసే వయస్సున్న జనాభాలో సగానికి సగం మంది. వీరిలో కొందరు రాజకీయ పార్టీలకు ఐటీ కరసేవకులుగా మారి వేలాది మందితో వాట్సప్‌ గ్రూపులు ప్రారంభించి క్షణాల్లో తప్పుడు వార్తలు, అభూతకల్పనలు ప్రచారం చేసే 'ఉద్యోగం'లో ఉన్నారు. దీన్ని దృష్టిలో పెట్టుకునే కాబోలు సంపత్‌ సరల్‌ అనే హిందీ వ్యంగ్య హాస్యకవి ''వీరందరికీ ఉచితంగా జియో కంపెనీ ఇంటర్నెట్‌ అందుబాటులోకి తేవటంతో దేశంలో నిరుద్యోగ సమస్య మటుమాయమైంది. ఒక్కొక్కరికి రెండు చేతుల నిండా పని దొరికింది'' అని వ్యంగ్యోక్తి వదిలారు. ఈ ప్రమాదాన్ని గుర్తించిన గూగుల్‌ ఒక్కో వార్తను (పోస్ట్‌) ఏకకాలంలో ఐదుగురుకి మించి పంపటానికి వీల్లేకుండా నియంత్రించింది. త్వరలో 'పదేపదే పదిమందికీ పంచడుతున్న వార్త(పోస్ట్‌)' అనే హెచ్చరికను కూడా జోడించనున్నట్టు వాట్సప్‌ నిర్వాహకులు చెప్పారు. దాన్నిబట్టి ప్రజలు అటువంటి వార్తలు చూడకుండా వాటివలన ప్రభావితం కాకుండా ఉంటారని ఓ ఆశ.

పైన ప్రస్తావించిన బీజేపీ సైబర్‌ ఆర్మీ 400+ అనే గ్రూపులో ఐదుగురు నిర్వాహకులున్నారు. బీజేపీ సామాజిక మాధ్యమాల ప్రధాన పర్యవేక్షకుడు అమిత్‌ మాలవీయ కూడా ఒకరు. ''కమ్యూనిస్టులు, కాంగ్రెసు వాదులు, ముస్లింలు, క్రైస్తవులు వంటి దేశాన్ని విచ్ఛిన్నం చేసే శక్తుల నుంచి దేశాన్ని కాపాడే యోధుల బృందం'' అని తమకు తాము కితాబునిచ్చుకున్న గ్రూపు ఇది. 2014 ఎన్నికల్లో బీజేపీకి వచ్చిన ఓట్లు 31శాతం. బీజేపీకి వ్యతిరేకంగా ఓటు చేసిన వాళ్లు 69శాతం. అంటే అమిత్‌ మాలవీయ నాయకత్వంలో బీజేపీ ఐటీ కరసేవకులు ఈ 69శాతంపై దాడికి సిద్ధమవుతున్నారన్న మాట. దేశంలో సగానికి పైగా జనాభాను అస్మదీయులుగా జమకట్టే పార్టీ నాయకత్వంలో ప్రజాస్వామ్యం మనుగడ సాగిస్తుందా? వారం రోజుల క్రితం రిపబ్లిక్‌ టెలివిజన్‌ ఛానల్‌కు ఇచ్చిన ఇంటర్వూలో ప్రధాని మోడీ తనది ఏకాభిప్రాయంతో సాగుతున్న పరిపాలన అని, సంఖ్యాబలంతో సాగుతున్న పరిపాలన కాదనీ సెలవిచ్చారు. విన్న వాళ్లకు ఏకాభిప్రాయం (అందరిదీ ఒకే మాట) అని పొరపాటున అర్థం చేసుకునే అవకాశం ఉంది. మోడీ చెప్పింది ఏక అభిప్రాయం (ఒకరి అభిప్రాయంతోనే) సాగుతున్న పరిపాలన అని స్వయంగా స్పష్టం చేశారు. ఈ విషయాన్ని రూఢ చేస్తున్నదే బీజేపీ సైబర్‌ ఆర్మీ స్వీయ కితాబు.

తాజాగా ముగిసిన తెలంగాణ శాసనసభ ఎన్నికల్లో కాంగ్రెస్‌ పార్టీ మసీదులకు ఉచిత కరెంట్‌ సరఫరా, ముస్లిం విద్యార్ధులకు మాత్రమే ఉపకారవేతనాలు వంటి వాగ్దానాలు చేసిందనీ బీజేపీ ఆధీనంలో నడిచే సామాజిక మాధ్యమాలు ప్రచారం చేశాయి. హిందూస్థాన్‌టైమ్స్‌ పత్రిక నిర్వహించిన ఓ పరిశోధనలో ఇటువంటి తప్పుడు ప్రచారం, ఫేక్‌ న్యూస్‌ను ప్రసారం చేసే పది గ్రూపుల్లో ఎనిమిది గ్రూపులు బీజేపీ శ్రేణులు నడుపుతున్నాయని తేలింది. ఏప్రిల్‌, మే నెలల్లో జరిగే లోక్‌సభ ఎన్నికల్లో బీజేపీ తరపున పని చేయటానికి 12లక్షలమంది ఐటీ కరసేవకులను వినియోగించనున్నది. ఓ చిన్న లెక్క వేద్దాం. ఈ 12లక్షలమంది ఒక్కొక్కరు ఒక్కో వాట్సప్‌ గ్రూపే నడుపుతారు అనుకుందాం. అంటే బీజేపీ అనుకూలంగా రూపొందించిన ఓ సందేశం (పోస్ట్‌) ఏకకాలంలో 30 కోట్ల 70లక్షలమందికి చేరుతుంది. అంటే 2014 ఎన్నికల్లో బీజేపీకి ఎంతమంది ఓటు వేశారో దాదాపు అంతమందికి రోజూ నేరుగా ఎన్నికల ప్రచారం చేరవేయగల యంత్రాంగాన్ని బీజేపీ సిద్ధం చేసింది. కనీసం రోజూ ఆరుకోట్ల మందికి తగ్గకుండా సందేశాలు చేరవేయాలన్నది బీజేపీ వ్యూహం. ఈ యంత్రాంగానికి అయ్యే ఖర్చు అటు అభ్యర్థి ఎన్నికల ఖర్చులో కనపడదు. ఇటు పార్టీల ఖర్చులో కనడపదు. దీన్నిబట్టి ఫేక్‌న్యూస్‌ ద్వారా బీజేపీ ప్రచారం ఏ స్థాయిలో ఉండబోతోందో ఓ అంచనాకు రావచ్చు. దాంతో పాటే దీని ప్రమాదం గురించి కూడా.
ఇది కేవలం వాట్సప్‌ మాధ్యమంగా బీజేపీ సృష్టించగలిగిన విస్పోటక తప్పుడు ప్రచారం. డిశంబరులో జరిగిన ఉత్తరాఖండ్‌, రాజస్థాన్‌, మధ్యప్రదేశ్‌, చత్తీస్‌గఢ్‌లల్లో కనీసం కోటిమందికి ప్రధాని పేరుతో రూపొందించిన నమో సాఫ్ట్‌వేర్‌ అప్లికేషన్‌ సహా జియో ఫోన్లు రాష్ట్ర బీజేపీ ప్రభుత్వాలు అందచేశాయి. పదే పదే పోస్ట్‌ అవుతున్న వార్తలను దానంతట అదే ఎంపిక చేసుకుని ఫోన్‌ వినియోగదారుల స్క్రీన్‌మీద కనిపించేలా చేయటం నమో సాఫ్ట్‌వేర్‌ అప్లికేషన్‌లో ప్రత్యేకత. కోటిమందికి చేతుల్లో ఉచిత ఫోన్లు, ఉచిత వైఫైతో పాటు పనిలేకుండా కూర్చోబెడితే జరిగే విధ్వంసం ఎలా ఉంటుందో ఊహించుకోవచ్చు. ఇటువంటి ఫేక్‌ న్యూస్‌ వైరస్‌ వ్యాప్తిని అరికట్టడానికి కేంద్ర ఎన్నికల సంఘంతో పాటు ఆయా బహుళజాతి కంపెనీలు చిత్తశుద్ధితో ప్రయత్నం చేయకపోతే 2019 లోక్‌సభ ఎన్నికలు స్వేచ్ఛాయుతమైన ప్రశాంత వాతావరణంలో జరిగే అవకాశం లేదు.
- ధీర

Apr 04,2019
http://www.navatelangana.com/article/net-vyaasam/788542

వికాసం నుంచి విద్వేషానికి బీజేపీ వ్యూహం

లోక్‌సభ ఎన్నికల క్రమం మొదలైంది. ఏయే సమస్యల ఆధారంగా ఓట్లు అడగనున్నాయన్న విషయంలో ప్రధాన పార్టీల వ్యూహరచన దాదాపు పూర్తయ్యింది. రిపబ్లిక్‌ టెలివిజన్‌ ఛానెల్‌కు ఇచ్చిన ఇంటర్వూ ద్వారా ప్రధాని నరేంద్ర మోడీ ఎన్నికల ప్రచారాన్ని లాంఛనంగా ప్రారంభించారు. ప్రధాన ప్రతిపక్షానికి ప్రాతినిధ్యం వహిస్తున్న రాహుల్‌ గాంధీ గత మూడు నెల్ల నుంచీ ఎన్నికల ప్రచారం మూసలోనే ఉన్నారు. గత నెల రోజులుగా జరుగుతున్న పరిణామాలు గమనిస్తే ఓ విషయం స్పష్టంగా కనిపిస్తుంది. ప్రతిపక్షాలు ప్రజా సమస్యలపై ప్రభుత్వాన్ని నిలదీయాలని కంకణం కట్టుకుంటే పాలక బీజేపీ ప్రచార వ్యూహం ప్రజా సమస్యలకు ఏ మాత్రం తావిచ్చేదిగా లేదు. ఈ దిశగా జరుగు తున్న తాజా పరిణామాలను గమనించాలి.
2014 ఎన్నికల్లో విజయం సాధించిన బీజేపీ, దాని నేత మోడీని ఆకాశానికెత్తుతూ పెద్ద ఎత్తున ప్రచారం జరిగింది. 2014 ఎన్నికల్లో నిరుద్యోగం, అవినీతి, దివాళా తీసిన ఆర్థిక వ్యవస్థ, కొరవడిన మహిళా భద్రత, వ్యవసాయక సంక్షోభం వంటి విషయాలు ఎన్నికల్లో బీజేపీ ప్రచారాస్త్రాలుగా మారాయి. ఇవన్నీ యూపీఏ ప్రభుత్వ వైఫల్యాలు. వీటితో పాటు తాము అధికారానికి వస్తే విదేశాల్లో ఉన్న నల్లధనాన్ని మూటకట్టి దేశానికి తేవటం, ప్రజల బ్యాంకు ఖాతాల్లో 15లక్షలు జమ చేయటం వంటి వరాల గురించి కూడా వాగ్దానాలు చేసింది బీజేపీ. కాంగ్రెస్‌ ముక్త భారతం, ప్రతిపక్ష విముక్త భారతం రాజకీయ లక్ష్యాలుగా ప్రకటించింది.
2019 లోక్‌సభ ఎన్నికల్లో మరోసారి అధికారం ఇవ్వమని బీజేపీ ప్రజల వద్దకు వస్తోంది. బీజేపీ 2014లో తనకు తాను నిర్దేశించుకున్న పై ఎజెండాను ఎంతవరకు సాధించింది, వాగ్దానాలు ఏ మేరకు అమలు చేసింది, లక్ష్యాల సాధనలో ఎంత దూరం ప్రయాణించింది సమీక్షించేందుకు ఈ ఎన్నికలు ఓ సందర్భం. కానీ బీజేపీ ప్రచార శైలి వీటిల్లో ఏ ఒక్క అంశాన్నీ తడమటం లేదు. గత ఐదేండ్లేలో ప్రభుత్వం ముందుకు తెచ్చిన ఏ ఒక్క విషయం నమ్మశక్యంగా లేదు. గతంలో కనీసం రైతాంగ ఆత్మహత్యల సంఖ్య జాతీయ నేర రికార్డుల బ్యూరో లెక్కల్లోనైనా కనిపించేవి. వ్యవసాయరంగ సంక్షోభాన్ని అంచనా వేయటానికి ఈ వివరాలు ఓ ప్రాతిపదికగా ఉండేవి. దాంతో అసలు వ్యవసాయ రంగంలో ప్రభుత్వ వైఫల్యాలు చర్చకే రాకుండా ఉండాలంటే ప్రభుత్వ గణాంకాల్లో ఇటువంటి వివరాలు లేకుండా చేస్తే పరిష్కారం దొరికినట్టే అన్న అవగాహనతో ప్రభుత్వం పని చేస్తోంది. వెనకటికి ఎవరో గురుత్వాకర్షణ శక్తి కారణం గానే జనం సుడిగుండాల్లో చిక్కుకుని చనిపోతున్నారని భావించి దేశంలో చెరువులు, బావులు, కుంటలు అన్నీ పూడ్చివేయించాడట. ప్రభుత్వ వైఫల్యాలకు సంబంధించిన అన్ని అంశాల్లోనూ మోడీ ప్రభుత్వం వైఖరి ఇలానే ఉంది.

ఫలితమే నిన్న మొన్నటి వరకు శాంతిభద్రతల సమస్యగా ఉన్న ఉగ్రవాదం, తీవ్రవాదం నేడు ఓట్లు పిండే కామధేనువుగా మారింది. గత ఐదేండ్లల్లో భారతదేశంలో ఉగ్రవాద దాడి ఎక్కడా జరగలేదన్నది మోడీ ఢంకా బజాయించి చేస్తున్న ప్రచారాల్లో ఒకటి. నిజానికి యూపీఏ-2 పాలనా కాలంలో కూడా ఉగ్రవాద దాడులు జరగలేదు. యూపీఏ-1 హయాంలో అటు ముస్లిం తీవ్రవాదం, ఇటు హిందూత్వ తీవ్రవాద ఘాతుకాలు చోటు చేసుకున్నాయి. బీజేపీ ప్రచారం ఇక్కడితో ఆగలేదు. జమ్ముకాశ్మీర్‌లో జరుగుతున్న ఉగ్రవాద చర్యలను అడ్డు పెట్టుకుని దేశవ్యాప్తంగా హిందువులు పెద్దఎత్తున అభద్రతా భావంతో బతుకులీడుస్తున్నారని, బిక్కుబిక్కు మంటూ కాలం గడుపుతున్నారనీ వార్దాలో జరిగిన బహిరంగ సభలో మాట్లాడారు. అదే వార్దాలో 2014 ఎన్నికల్లో భాగంగా జరిగిన బహిరంగసభలో 32నిముషాలు మాట్లాడిన మోడీ 18నిముషాలు రైతాంగ సమస్యలు గురించి ప్రస్తావిస్తే 2019లో జరిగిన సభలో 25నిముషాలు సీమాంతర ఉగ్రవాదం గురించి, ప్రతిపక్ష పార్టీల దేశభక్తి రాహిత్యం గురించీ మాట్లాడారు. 2014 నాటికీ 2019 నాటికీ తేడా ఒక్కటే. నాడు మహారాష్ట్రలో కాంగ్రెస్‌ ఎన్సీపీ ప్రభుత్వం అధికారంలో ఉంటే నేడు బీజేపీ శివసేన కూటమి అధికారంలో ఉంది. దాంతో ఈ ఐదేండ్ల కాలంలో మహారాష్ట్రలో ఆత్మహత్య చేసుకున్న సుమారు 20వేల మంది రైతాంగం ప్రధాని దృష్టిలో అప్రాధాన్యతా అంశంగా మారింది.

రిపబ్లిక్‌ టీవీ ఇచ్చిన ఇంటర్వూలో సైతం జాతీయ భద్రత పెను ప్రమాదంలో పడిందనీ, ఆ ప్రమాదాన్ని ఎదుర్కోవాలంటే తనలాంటి చాకచక్యం కలిగిన నేతను ప్రధానిగా ఎన్నుకోవాలని కోరుతున్నారు. తనకు ముందు పరిపాలన చేసిన వారంతా వెధవాయిలు. తానొక్కడినే దక్షత కలిగిన బుద్ధిమంతుడిని అని జబ్బలు చర్చుకునే ప్రయత్నం. సరిహద్దులకు అవతల ఉన్న శతృవులుతో పాటు సరిహద్దుకు లోపల ఉన్న శతృవులు - హేతువాదులు, కమ్యూనిస్టులు, ఉదారవాదులు, పత్రికారంగం. వీటన్నింటిని ఓడించటమంటే దేశంలో ప్రతిపక్షాన్ని అధికారానికి రాకుండా చేయటమే. తిరిగి మరోసారి బీజేపీని ఎన్నుకోవటమే గత్యంతరం లేని స్థితి అన్న వాతావరణాన్ని కల్పించటంలో మోడీ బీజేపీ సకల అస్త్రశస్త్రాలు ప్రయోగిస్తుంది. ఇక్కడ సీమాంతర ఉగ్రవాదాన్ని ప్రస్తావించటం వెనక మూడు లక్ష్యాలు ఉన్నాయి. మొదటిది పాకిస్థాన్‌కు సీమాంతర ఉగ్రవాదానికి ఉన్న అనుబంధాన్ని ఎత్తి చూపటం. రెండోది భారతదేశంలో ఉన్న ముస్లింలకు పాకిస్థాన్‌ పట్ల ఉన్న సానుకూల అభిప్రాయాలను గుర్తు చేయటం. మూడోది ఈ దేశంలో ఉన్న ముస్లింలందరూ జాతి భద్రతకు ప్రమాదకారులే అన్న ఆరెస్సెస్‌ నిర్ధారణను దేశ ప్రజలపై రుద్దడం. ఈ విధమైన వైఖరితో జాతీయ భద్రత నినాదం మాటున దేశవ్యాప్తంగా అభద్రతా భావాన్ని పెంచి పోషిస్తున్నారు. ఇది రానున్న కాలంలో మరింత ప్రమాదకర స్థాయికి చేరుకోనుంది.

ఈ ప్రచార శైలితో బీజేపీ ఓ విషయాన్ని దేశం ముందుంచ దల్చుకున్నది. బీజేపీ ఓడిపోతే దేశం ఉగ్రవాదులతో నిండిపోతుందని భయావహ వాతావరణం నెలకొంటుందన్న అపోహలు పెంచిపోషిస్తున్నారు ప్రధాని మోడీ. దాంతోపాటు మోడీని వ్యతిరేకించే వారు, బీజేపీని వ్యతిరేకించే వారంతా పాకిస్థాన్‌ శ్రేయోభిలాషులే అన్న వాతావరణం కల్పించేందుకు సాగిస్తున్న ప్రయత్నం నిజానికి దేశ ప్రజల మధ్య రాజకీయ ధార్మిక వైషమ్యాలను పెంచి పోషించేదిగా ఉంది. ఈ తరహా ఉపన్యాసం చూస్తే 9/11 తర్వాత జార్జి బుష్‌ జూనియర్‌ ఉపన్యాసం గుర్తురాక మానదు. అల్‌ఖైదా దాడుల నేపథ్యంలో జాతినుద్దేశించి చేసిన ప్రసంగంలో బుష్‌ ప్రపంచంలో అమెరికాను సమర్థించని వారంతా తాలిబాన్లను సమర్థిస్తున్నట్టేనని నిర్ధారించారు. ఈ వాదనను మరింత పొడిగిస్తూ మోడీ ఉగ్రవాద వ్యతిరేక పోరాటంలో విజయాల గురించి వర్ణించాలని కోరితే సైన్యాన్ని నిలదీయటంతోనో అవమానించటంతోనో పోలుస్తున్నారు. ఈ తరహా రాజకీయాలు నిరంకుశ పాలనకు పునాదులు వేస్తాయి. నిరంకుశ పాలన ఫాసిజంగా రూపాంతరం చెందటానికి ఎంతో కాలం పట్టదు.
వ్యవసాయ సంక్షోభం, ఉపాధి నష్టం, గ్రామీణ ఆర్థిక వ్యవస్థ దివాళా వంటి సాధారణ విషయాలు చర్చించేటప్పుడు సాలిడారిటీ ఏర్పడుతుంది. సంఘటితమవుతుంది. సరికొత్త ఐక్యతకు పునాదులు పడతాయి. నూతన ప్రచార వ్యూహం. ప్రచారంలో చర్చకు పెట్టే అంశాలు రెండు ప్రయోజనాలు సాధిస్తాయి. ఒకటి నేరుగా తమ ప్రజాపునాదిని కార్యోన్ముఖులను చేయటం. తమ ప్రజాపునాదికి బయట ఉన్న వారి అస్త్రశస్త్రాలు నిర్వీర్యం చేయటం. ఉగ్రవాదం, పాకిస్థాన్‌, అవినీతీ చర్చకు వచ్చినప్పుడు సంఘీభావ పొరలు చెదిరిపోతాయి. ఐక్యత బీటలు వారుతుంది. ఈ విధంగా పాలకుల విధానాల ద్వారా నష్టపోతున్న ప్రజల మధ్య అనైక్యత సృష్టించటంలో పాలక పార్టీ జయప్రదం అయితే పాలకవర్గ ప్రయోజనాలు సులక్షణంగా కాపాడటమే. అందుకే ఓటర్ల నిజమైన ప్రయోజనాలు కాపాడాలనుకునే పార్టీలు దైనందిన ఆర్థిక సామాజిక సమస్యలను చర్చకు పెట్టాలి. ప్రత్యామ్నాయ రాజకీయ వాతావరణానికి పునాదులు వేయాలి. ప్రత్యామ్నాయ ఎజెండాను ప్రజల ముందు పెట్టకుండా ప్రత్యామ్నాయ శక్తుల రాజకీయ ప్రాధాన్యతను అవసరాన్ని ప్రజలు గుర్తించటం సాధ్యం కాదు. అందువల్లనే భారతదేశంలో నాల్గోవంతుగా ఉన్న ముస్లిం జనాభాను శతృవులుగా చూపించే ప్రచారానికి ఊతమివ్వకుండా ప్రజలెదుర్కొంటున్న ఆర్థిక సామాజిక సమస్యలను ఎన్నికల ప్రచారంలో ప్రధాన సమస్యలుగా మార్చటమొక్కటే ప్రజాతంత్ర ఐక్యతను పరిరక్షించే మార్గం.
- ప్రశాంత్‌

 Apr 06,2019

http://www.navatelangana.com/article/net-vyaasam/789099

 ప్రజాస్వామ్యాన్ని పరిరక్షించే కర్తవ్యం ఎన్నికల సంస్కరణలు

పదిహేడవ లోక్‌సభ ఎన్నికల తతంగాన్ని గమనిస్తుంటే రాజకీయ పార్టీలు ఎన్నికల్లో పెట్టే ప్రత్యక్ష పరోక్ష ఖర్చును మూల్యాంకనం చేయటం, ఎన్నికల్లో ధన ప్రభావాన్ని తగ్గించటానికి ఎన్నికల వ్యయ సంస్కరణలు తక్షణ అవసరంగా కనిపిస్తున్నాయి. దేశంలో అధికారం కోసం పోటీ పడుతున్న పాలక పార్టీలు గానీ, ప్రధాని పదవికి బరిలో దిగుతున్న నేతలు కానీ ఈ విషయాన్ని ప్రస్తావించక పోవటం ఆశ్చర్యం. ప్రజాస్వామ్యానికి పట్టుగొమ్మలు, నాల్గో స్తంభంగా చెప్పుకుంటున్న పత్రికా రంగం ఈ విషయాన్ని చర్చకే తీసుకురాకపోవటం మరింత విడ్డూరంగా ఉంది. గత దశాబ్ద కాలంగా ఎన్నికల్లో ధన ప్రభావం గురించి చర్చ జరుగుతున్నది. రాజకీయ పార్టీలకు కార్పొరేట్‌ కంపెనీలకు మధ్య ఉన్న అవినాభావ సంబంధాన్ని విడదీయకపోతే ప్రాతినిధ్య ప్రజాస్వామ్యం పదికాలాల పాటు వర్ధిల్లటం అసాధ్యం.
రాజకీయ పార్టీలకు, గుత్త పెట్టుబడిదారులకు మధ్య ఉన్న బాదరాయణ సంబంధం బహిరంగ రహస్యమే. ప్రత్యేకించి ఎన్నికల సమయంలో పారిశ్రామిక వర్గం తమ ప్రయోజనాలకు ప్రాతినిధ్యం వహించే రాజకీయ పార్టీలకు ఇతోధికంగా అండదండలు అందిస్తాయి. అధికారంలోకి వచ్చిన పార్టీ ఆయా పారిశ్రామిక వర్గాల ప్రయోజనాలను దృష్టిలో పెట్టుకుని వ్యవహరించటం కూడా చూస్తుంటాం. అందుకే ప్రభుత్వం దోపిడీ వర్గాల తరపున పని చేసే సాధనం అంటారు. ప్రపంచీకరణ సంస్కరణలు తెరమీదకు రాకముందు ఈ సంబంధం లోగుట్టుగా ఉండేది. ప్రపంచీకరణ విధానాలు రాచమర్యాదలు పొందుతున్న ఈ కాలంలో పాలక పార్టీలకు, పాలక వర్గాల ప్రతినిధులైన గుత్తపెట్టుబడిదారీ సంస్థలకు, వాటికి మిత్రులుగా ఉన్న విదేశీ బహుళజాతి కంపెనీలకు మధ్య ఉన్న సంబంధం బాహాటంగానే వెల్లడవుతోంది. దీని పర్యవసానంగానే గతంలో ప్రజా సేవకు జీవితాలు అంకితమైన త్యాగధనుల స్థానంలో వేల కోట్ల ఆదాయం కలిగిన కార్పొరేట్‌ వర్గం పార్లమెంట్‌లో అడుగుపెడ్తోంది. ఈ పరిస్థితిలో ఎంతో కొంత మార్పు సాధించాలన్నా, ప్రజాస్వామ్యం నిజమైన ప్రాతినిధ్య స్వభావాన్ని కోల్పోకుండా ఉండాలన్నా తక్షణమే ఎన్నికల్లో ధన బలాన్ని నియంత్రించాలి. ఈ చర్చకు దారితీసిన తక్షణ సందర్భాన్ని గమనిద్దాం.

విదేశాల్లో ఉన్న నల్లధనానికి ముక్కుకు కళ్లెం వేసి లాక్కొచ్చి దేశంలో ఖాతాదారులందరికీ పంచుతామన్నది బీజేపీ ప్రభుత్వ వాగ్దానం. ఈ నల్లధనాన్ని బయటికి తేవటానికే 2016 నవంబర్‌లో ఓ సాయంత్రం ప్రధాని మోడీ నోట్లరద్దు ప్రకటించారు. ఈ నిర్ణయంతో అప్పటి వరకు వెయ్యి, ఐదువందల నోట్ల రూపంలో నిల్వ ఉన్న నల్లధనం ఏరులై పారుతుందనీ, ఈ నోట్లు రద్దు చేస్తే ఈ నల్లధనం అంతా మటు మాయమవుతుందనీ, స్వచ్ఛమైన పారదర్శకమైన ఆర్థిక వ్యవస్థను నిర్మించుకోవచ్చనీ చెప్పారు. ప్రధాని అంతటివాడు చెపుతుంటే నిజమో కామోసు అని ప్రజలు కూడా నమ్మారు. కానీ ఏమి జరిగిందో దేశానికి తెలుసు. కోట్లాదిమంది రోజు వారీ వేతనాలపై ఆధారపడిన కార్మికులను, రైతాంగాన్ని రెండేండ్ల పాటు కోలుకోకుండా కుంగదీసింది ఈ నిర్ణయం. అయినా ప్రజలకు క్షమాపణ చెప్పేందుకు కూడా సిద్ధం కానంత తలబిరుసుతో వ్యవహరిస్తున్నారు మోడీ, బీజేపీ నాయకులు. ఇదలా ఉంచితే నల్లధనాన్ని నియంత్రించేందుకు సాహసోపేతమైన నిర్ణయం తీసుకున్నామన్న మూడ్నెల్లల్లోనే నల్లధనంతో రాజకీయ పార్టీలు తమ ఖజానా నింపుకోవటానికి కావల్సిన చట్టాన్ని పార్లమెంట్‌లో ఉన్న సంఖ్యాబలంతో ఆమోదించింది బీజేపీ ప్రభుత్వం. అదే ఎన్నికల బాండ్లకు సంబంధించిన చట్టం. ఈ చట్టం కేవలం ప్రజా ప్రాతినిధ్య చట్టానికి సంబంధించింది. అయినా ద్రవ్య బిల్లు రూపంలో ఆమోదించుకుంది మోడీ ప్రభుత్వం.

ఎన్నికల బాండ్లు పేరుతో కార్పొరేట్‌ కంపెనీలు రాజకీయ పార్టీలను తమ ఏజెంట్లుగా మార్చుకునే ప్రమాదం ఉందని, ఇది ప్రజాస్వామ్యానికి చేటు తెస్తుందనీ న్యాయనిపుణులు, ఎన్నికల సంఘం మాజీ ప్రధానాధికారులు నెత్తీ నోరూ బాదుకున్నా బీజేపీ ప్రభుత్వం వినిపించుకోలేదు. 2018లో మార్చి నుంచి నవంబరు మధ్యలో 1056.73 కోట్ల రూపాయల విలువైన ఎన్నికల బాండ్లు జారీ అయితే 2019 ఎన్నికల సంవత్సరంలో జనవరి నుంచి మార్చి వరకు 1700 కోట్ల రూపాయల విలువైన ఎన్నికల బాండ్లు కొనుగోళ్లు జరిగాయి. అంటే ఎన్నికల సంవత్సరంలో బాండ్ల రూపంలో రాజకీయ పార్టీలకు అందిన చందాలు 62శాతం పెరిగాయి. ఈ అమ్మకాలు ప్రధానంగా ముంబయి (495.6 కోట్లు) కొల్‌కతా (370.70 కోట్లు), హైదరాబాద్‌ (290.50 కోట్లు), ఢిల్లీ (205.92 కోట్లు), భువనేశ్వర్‌ (194 కోట్లు)లల్లో జరిగాయి. అంటే ఈ మూడ్నెల్లలో అమ్ముడుపోయిన ఎన్నికల బాండ్లలో 91.5శాతం ఈ నగరాల్లోనే అమ్ముడయ్యాయి. ఈ నిధుల్లో 95శాతం ఒక్క బీజేపీకి మాత్రమే జమ పడ్డాయి. అంటే ఈ ఎన్నికల్లో అధికారికంగా బీజేపీ సుమారు 2618 కోట్ల మిగులు నిధులతో ఎన్నికల బరిలోకి దిగింది. మిగిలిన పార్టీలకు దక్కింది కేవలం రూ.138 కోట్లు మాత్రమే.

కేంద్ర ప్రభుత్వం 2017లో ఆమోదించిన చట్టం ప్రకారం గత సార్వత్రిక ఎన్నికల్లో కనీసం ఒక్కశాతం ఓట్లు తెచ్చుకున్న రిజిస్టర్డ్‌ రాజకీయ పార్టీలు ఈ బాండ్ల పథకం కింద లబ్ది పొందటానికి అర్హులు. బాండ్‌ మార్కెట్‌లోకి వచ్చాక 15రోజుల్లోపు పార్టీ ఖాతాలో జమ చేసుకోవాలి. ఇందులో మరో ప్రమాదకరమైన క్లాజు కూడా ఉంది. భారతదేశంలో పని చేస్తున్న విదేశీ బహుళజాతి కంపెనీలు కూడా పూర్తిగా దేశీయ కంపెనీలుగా పరిగణించబడతాయని 2017లో ఆమోదించిన చట్టం చెప్తోంది. అంటే ఇంతవరకు విదేశీ కంపెనీల నుంచి రాజకీయ చందాలు తీసుకోరాదన్న షరతు ఇక మీద వర్తించదు. ఈ కంపెనీలన్నీ దేశీయ కంపెనీల కేటగిరీలోకి వచ్చి చేరిన తర్వాత ఈ కంపెనీలు కూడా ఎంత మొత్తమైనా చెప్పా పెట్టకుండా ఏ పార్టీకైనా నిధులు ఇవ్వవచ్చు. అంటే భారతీయులు తమ ప్రతినిధులను ఎన్నుకునే క్రమాన్ని తారుమారు చేయాలంటే విదేశీ కంపెనీలు ఎంతమొత్తమైనా పెట్టుబడి పెట్టవచ్చు. తమ ప్రయోజనాలు కాపాడు కునేందుకు సహకరించే పార్టీలను, ఆ పార్టీలకు చెందిన అభ్యర్థులను ఎన్నుకోవచ్చు. తద్వారా భారత ప్రజాస్వామ్యాన్ని అపహాస్యం చేయటానికి కావల్సిన పునాదులు వేసింది బీజేపీ.
అంతేకాదు. సోషల్‌ మీడియా ద్వారా జరిగే ఖర్చును అభ్యర్థి, లేదా రాజకీయ పార్టీ ఎన్నికల వ్యయంలో భాగంగా భావించకపోవటం విచ్చలవిడిగా ఖర్చు పెట్టడానికి అవకాశమిస్తోంది. ఉదాహరణకు అసోషియేషన్‌ ఆఫ్‌ బిలియన్‌ మైండ్స్‌ అనే కంపెనీ దాదాపు మూడేండ్ల నుంచీ మోడీకి అనుకూలంగా బీజేపీకి అనుకూలంగా సోషల్‌ మీడియాలో పని చేస్తోంది. నమో, భారత్‌ కీ మన్‌ కీ బాత్‌, మైభీ చౌకీదార్‌ హూ వంటి ఫేస్‌బుక్‌ పేజీలతో రోజూ కోట్లాదిమందికి మోడీ అనుకూల ప్రచారాన్ని చేరవేస్తున్న కంపెనీల మీద అయ్యే ఖర్చును ఎన్నికల ఖర్చుగా పరిగణించే వ్యవస్థ అందుబాటులో లేదు. దాంతో అటువంటి కంపెనీలను ఏర్పాటు చేసి వాటి ద్వారా ఎన్నికల ప్రచారాన్ని సాగించటానికి బీజేపీ చేస్తున్న ప్రయత్నాలు దొడ్డిదారిన ఎన్నికలు ధనబలంతో ప్రభావితం చేసేందుకు కావల్సిన ఏర్పాట్లు చేసుకున్నాయి. ఈ ప్రచారం ద్వారా లబ్ది కూడా అభ్యర్థుల ఎన్నికల వ్యయంలో దీనికయ్యే నెలసరి ఖర్చును కూడా కలిపితే తప్ప ఇలాంటి తప్పుడు మార్గాల్లో ప్రాతినిధ్య ప్రజాస్వామ్యాన్ని అపహాస్యం చేసే అవకాశాలకు అడ్డుకట్ట వేయలేం. అందుకే తక్షణమే ఎన్నికల వ్యయం నిర్వచనాన్ని మరింత విస్తృత పర్చాలి. పార్టీలు సోషల్‌ మీడియాపై పెట్టే ఖర్చును, దానికి ఉపయోగించే సాఫ్ట్‌వేర్‌ ఉద్యోగుల వేతనాలను కూడా ఎన్నికల వ్యయంగా పరిగణించేలా నిర్వచనాన్ని మార్చాలి. అప్పుడే ఎన్నికల ప్రచారం, ధన ప్రభావం గాడి తప్పకుండా ఉంటాయి.

అసోసియేషన్‌ ఫర్‌ డెమొక్రటిక్‌ రిఫార్మ్స్‌ సంస్థ నిర్వహించిన సర్వేలో 71శాతం మంది ఓటర్లు పార్టీని చూసి ఓటు చేస్తున్నారు అని నిర్ధారణయింది. దీన్ని మరింత పకడ్బందీగా అమలు చేయటానికి వీలైన మార్గం దామాషా ఎన్నికలు. ఈ ఎన్నికల్లో ఓటర్లు బరిలో ఉన్న రాజకీయ పార్టీలను ఎన్నుకుంటారు. ఆయా పార్టీలకు వచ్చిన ఓట్ల నిష్పత్తికి అనుగుణంగా సదరు పార్టీ తమ అభ్యర్థులను ఎంపిక చేసి చట్టసభలకు పంపుతుంది. తద్వారా పార్టీ ఫిరాయింపులు కూడా నియంత్రించవచ్చు. దిగువసభల్లోనూ, అనేక కార్మిక సంఘాల ఎన్నికల్లోనూ ఈ దామాషా పద్ధతిన ఓట్లు లెక్కించే అవకాశం ఉన్నప్పుడు లోక్‌సభలో అటువంటి వ్యవస్థను అమలు చేయటం కూడా తేలికే. దామాషా ఎన్నికలు, ఎన్నికల వ్యయ సంస్కరణలు చేపట్టకపోతే రానున్న కాలంలో ప్రజలు తమకు నచ్చిన పార్టీలు, అభ్యర్థులను చట్టసభలకు పంపే ప్రజాస్వామ్యం కాస్తా కంపెనీలు తమ అవసరాలు తీర్చగల పార్టీలను, అభ్యర్థులను చట్టసభలకు పంపే కార్పొరేట్‌ స్వామ్యంగా మారిపోతుంది.
- చైతన్య

Apr 11,2019
http://www.navatelangana.com/article/net-vyaasam/791442

గాడి తప్పుతున్న ప్రాతినిధ్య ప్రజాస్వామ్యం

భారత ప్రజాస్వామ్యం గాడి తప్పుతుందా? రాజ్యాంగ నిర్మాతలు ఒక మనిషి, ఒక ఓటు, ఒక విలువ సూత్రం స్వాతంత్య్రానంతర ప్రాతినిధ్య ప్రజాస్వామ్యానికి మూల సూత్రంగా ఉంది. బీజేపీ హిందూత్వ ఆధిపత్య రాజకీయాలు కేంద్ర స్థానం ఆక్రమించటం మొదలయ్యాక ఈ సూత్రం - ఒక మనిషి, ఒక ఓటు, ఒక విలువ - సూత్రానికి కొత్త నిర్వచనం అమల్లోకి వచ్చింది. భారతీయ ప్రజాస్వామ్యం భిన్నత్వంలో ఏకత్వానికి ప్రతినిధిగా ఉండాలని రాజ్యాంగ నిర్మాతలు ఆశించారు. కానీ నేడు అధికారంలో ఉన్న బీజేపీ మౌలిక అవగాహనలో దేశంలో ఎటువంటి భిన్నత్వానికి తావు లేదు. దేశమంతా అఖండ హిందూ దేశమే. ప్రాతినిధ్య ప్రజాస్వామ్యానికి బీజేపీ ఇస్తున్న నిర్వచనం కూడా ఈ అవగాహనకు తగ్గట్టుగానే ఉంది. బీజేపీ నమూనా ప్రజాస్వామ్యంలో కొన్ని సామాజిక తరగతులకు ప్రాతినిధ్యం అక్కర్లేదు. ముస్లింలు అటువంటి ఓ సామాజిక తరగతి.
సాధారణంగా ఎన్నికల పోరాటంలో బరిలోకి దిగేటప్పుడు రాజకీయ పార్టీలు సాధ్యమైనన్ని ఓట్లు సంపాదించేందుకు అనుగుణంగా అభ్యర్థులను ఎంపిక చేస్తాయి. అభ్యర్ధుల పొందిక ఆయా సామాజిక తరగతుల నుంచి ఓట్లు రాబట్టడంలో ఉపయోగపడుతుందా లేదా అన్నది అభ్యర్థుల ఎంపికలో పని చేసే ఏకైక సూత్రం అదేసమయంలో భారతదేశంలోని భిన్నత్వానికి అనుగుణంగా చట్టసభల్లో భిన్నత్వం ప్రాతినిధ్యం వహిస్తుందా లేదా అన్నది కూడా ప్రజాస్వామ్యం ఎంత ప్రజాతంత్రయుతంగా అమలవుతున్నదో వివరించే ఒక ఉదాహరణ. ఈ సారాంశాన్ని గాలికొదిలి కేవలం అభ్యర్థుల పొందిక ఆయా సామాజిక తరగతుల ఓట్లు రాబట్టే ఒక తాత్కాలిక వ్యూహంగా మారింది. చట్టసభలు ప్రజలందరి ప్రయోజనాల కోసం ఉద్దేశించినవి. కాలక్రమంలో అస్థిత్వ రాజకీయాలు ముందుకొచ్చిన తర్వాత ఆయా సామాజిక తరగతులకు చట్టసభల్లో ప్రాతినిధ్యం ఉందా లేదా అన్న ప్రశ్నకు, ఆయా తరగతుల ప్రయోజనాలకు ఏ మేరకు ప్రాతినిధ్యం ఉంటుందా లేదా అన్న ప్రశ్నకు మధ్య సంబంధం ఉంది. అటువంటి ఓ సామాజిక తరగతి సమకాలీన రాజకీయాల్లో ప్రాతినిధ్య రాహిత్యాన్ని ఎదుర్కొంటోంది. అది ముస్లిం సామాజిక తరగతి. 2019లో ముస్లిం సామాజిక తరగతి రాజకీయ హక్కుల గురించి మాట్లాడటానికి ఎంతో కొంత సాహసం కావాలి.

భారత రాజకీయ సామాజిక వ్యవస్థకు పునాదిగా ఉన్న లౌకిక వ్యవస్థపై ఆరెస్సెస్‌, జనసంఫ్‌ు, బీజేపీలు గత ఐదారు దశాబ్దాలుగా సాగిస్తూ వచ్చిన సైద్ధాంతిక దాడి మోడీ పరిపాలనలో పతాకస్థాయికి చేరింది. దీంతో లౌకిక ప్రజాతంత్ర రాజకీయాల స్థానంలో హిందూ ఆధిపత్య రాజకీయాలే ప్రధాన స్రవంతి రాజకీయాలుగా తెరమీదకు వచ్చాయి. 2019 లోక్‌సభ ఎన్నికల ప్రచారంలో మోడీ ఉపన్యాసాలు దీనికి పెద్ద ఉదాహరణ. దేశం అంటే హిందూమతం, హిందూమతమే దేశంగా మోడీ ఉపన్యాస ధోరణి ఉండటం గాడితప్పిన ప్రాతినిధ్య ప్రజాస్వామ్యానికి చిహ్నం.
ఒకసారి మతం, మతోన్మాద స్థాయికి చేరాక లౌకిక ప్రజాతంత్ర విలువలు వెనకపట్టు పడతాయి. స్వాతంత్య్రోద్యమ విలువలను పుణికిపుచ్చుకున్న లౌకిక ప్రజాతంత్ర విలువల ఆధారిత సామాజిక చైతన్యం స్థానే మత విశ్వాసాల ఆధారిత సామాజిక చైతన్యం నూతన రాజకీయ వేదికగా మారింది. సాధారణంగా చైతన్యం అనే భావన ఓ పురోగామి దృక్ఫధాన్ని ప్రతిబింబించే భావన. కానీ మతోన్మాద రాజకీయాల వేళ్లూనుకుపోయే కొద్దీ ఈ పురోగామి దృక్ఫథం, విశాల దృక్కోణం కాస్తా సంకుచిత అస్థిత్వాల చుట్టూ గిరిగీసుకుపోయే తిరోగామి భావనగా మారింది. సాధారణంగా జనసామాన్యంలో వాడుకలో ఉన్న భావనలకు కొత్త కొత్త టీకా తాత్పర్యాలను రూపొందించి ప్రచారంలో పెట్టడంలో ఆరెస్సెస్‌ది అందె వేసిన చేయి. అటువంటి ప్రచారం గత ఐదేండ్లుగా ఇంకా చెప్పాలంటే 2002నుంచీ ఓ ఉద్యమంలా సాగించింది ఆరెస్సెస్‌. దాంతో సామాజిక అవగాహన యావత్తూ తిరోగమన పట్టాలెక్కింది. దీనికి సరైన ఉదాహరణ చట్టసభల్లో ముస్లింల ప్రాతినిధ్యానికి సంబంధించిన సమస్య.

బీజేపీ, దాని మాతృక ఆరెస్సెస్‌ అవగాహనలో భారతదేశంలో ముస్లింలు ద్వితీయశ్రేణి పౌరులు. ప్రజాస్వామ్యంలో పౌరులను శ్రేణులవారీగా విభజించి వ్యవహరించే పద్ధతి లేదు. సమాజంలోని పౌరులను దొంతర్లుగా విభజించి సామాజిక నిర్మాణంలో ఆయా దొంతరకున్న స్థానాన్ని బట్టి హక్కులు, అవకాశాలు కల్పించటం భూస్వామ్య, అర్థ భూస్వామ్య వ్యవస్థ లక్షణం. ఒకవైపున దేశాన్ని 21వ శతాబ్దంలో ఆర్థికంగా ప్రపంచ అగ్రరాజ్యాల సరసన నిలబెట్టాలని వాగ్దానాలు చేస్తూనే సామాజికంగా దేశాన్ని చీకటియుగాలకు తీసుకెళ్లటం బీజేపీ, ఆరెస్సెస్‌ ద్వంద్వ వైఖరి. ఏ విషయంలో నైనా ద్వంద్వ వైఖరిని ఆరెస్సెస్‌ పెట్టింది పేరు. ప్రతిధ్వని సినిమాలో రాజకీయ నాయకుని పాత్ర శైలిలో.
2014లో ఎన్నికైన 16వ లోక్‌సభలో అత్యంత తక్కువగా 22మంది పార్లమెంట్‌ సభ్యులు ముస్లిం మైనారిటీలున్నారు. లోక్‌సభలో ఆధిపత్యం వహిస్తున్న బీజేపీ నుంచి ఒక్కరు కూడా ముస్లిం ఎంపి లేకపోవటం గమనించాల్సిన విషయం. స్వాతంత్య్రానంతరం జరిగిన తొలి ఎన్నికల్లో మొదటిసారి 23మంది ముస్లిం అభ్యర్థులు ఎన్నికయ్యారు. నాటి నుంచీ పూర్తిగా జనాభా ప్రాతినిధ్యానికి అనుగుణంగా కాకపోయినా మెరుగైన మోతాదులో ముస్లిం అభ్యర్ధులకు పార్టీలు టిక్కెట్లు ఇవ్వటం, వారిని గెలిపించటం సాంప్రదాయంగా మారింది. గత ఐదు దశాబ్దాలుగా లౌకికతత్వం అంటే (హిందు, ముస్లింలు సమానమనే భావన) ముస్లిం ఓటు బ్యాంకు రాజకీయమే అంటూ ఆరెస్సెస్‌ సాగించిన ప్రచారం ప్రభావం నేడు చట్టసభల్లో కనిపిస్తుంది. అటు ప్రజలకు ప్రాతినిధ్యం వహించే లోక్‌సభలో తమ పార్టీ తరపున ముస్లింలకు ప్రాతినిధ్యం వహించకుండా రాజ్యాధికారాన్ని చేజిక్కించుకోవచ్చన్న నమ్మకం కలిగాక బీజేపీ మరింత బరితెగించింది. 2016లో జరిగిన ఉత్తరప్రదేశ్‌ శాసనసభ ఎన్నికల్లో కనీసం ఒక్క ముస్లిం అభ్యర్ధిని కూడా నిలబెట్టకుండా ఎన్నికల్లో గెలిచింది. ఈ క్రమం 2002లో గుజరాత్‌ శాసనసభ ఎన్నికలతో మొదలైంది.

దాదాపు 14శాతంగా ఉన్న ముస్లిం జనాభాకు చట్టసభల్లో ప్రాతినిధ్యం లేకుండా వారి ప్రయోజనాలు కాపాడే మార్గం ఉందా? ఇక్కడ ముస్లిం ప్రాతినిధ్యం గురించి చేస్తున్న చర్చ అస్థిత్వ రాజకీయాల చర్చగా పరిగణించరాదు. లౌకిక ప్రజాతంత్ర కోణం ఇందులో ఉంది. పురోగామి లక్షణాలకు, తిరోగామి లక్షణాలకు, ప్రజాతంత్ర స్వభావానికి, నిరంకుశాధిపత్యానికి మధ్య ఉన్న సన్నని గీతను గమనించకపోతే అస్థిత్వ రాజకీయాలు మితవాదులు, మతోన్మాదులు, ఫాసిస్టుల చేతుల్లో ఆయుధాలుగా మారతాయి. ముస్లింలు ద్వితీయ శ్రేణి పౌరులు అన్న మధ్యయుగాల అవగాహనతో వారికి చట్టసభల్లో ప్రాతినిధ్యం దూరం చేయటం ప్రజాతంత్ర రాజ్యాంగాన్ని పరిరక్షించుకునే చర్య కాదు. దేశ జనాభాలో హిందువుల తర్వాత అతి పెద్ద సామాజిక తరగతి ముస్లింలు. అటువంటి ముస్లింలను చట్టసభల నుండి వెలి వేయటం, ద్వితీయ శ్రేణి పౌరులుగా చూడటం అంటే సామాజిక జీవనంలో వారి పాత్రను కుదించటమే. అటువంటి సంకుచిత రాజకీయా లతో హిందూ ఓటు బ్యాంకుపై గుత్తాధిపత్యం సాధించేందుకు బీజేపీ ముస్లింలను శతృవులుగా చూపబూనుకొంటోంది.
మోడీ ప్రభుత్వాన్ని, ప్రభుత్వ చర్యలను వ్యతిరేకించే వారినందరినీ దేశ ద్రోహులుగా ముద్ర వేయటం ఈ కాలంలో పెరిగిన ఆందోళనకర పరిణామం. ఇది మరింత ముదిరి మోడీ లేదా బీజేపీ లేదా ఆరెస్సెస్‌ వ్యతిరేకులు పాకిస్థాన్‌కు వెళ్లవచ్చన్న చర్చలు బాహాటంగా ఎంపీలు, మంత్రులు, పార్టీ సీనియర్‌ నాయకులే చేస్తున్నారు. వీటి ఖండించేందుకు ప్రయత్నం చేయకపోగా మోడీ స్వయంగా దీన్ని మరింత విస్తరించి హిందూత్వం = దేశభక్తి = ఉగ్రవాద వ్యతిరేకత = పాకిస్థాన్‌ వ్యతిరేకత = ముస్లిం వ్యతిరేకత అన్న అర్థంలో ఎన్నికల ప్రచారం మొదలు పెట్టారు. మతం పేరుతో ఓటర్లను ప్రభావితం చేయరాదన్న చట్టం ప్రధానికి వర్తించదా? బాహాటంగా హిందూ ప్రయోజనాలే దేశ ప్రయోజనాలు అని గాండ్రించటం ప్రాతినిధ్య ప్రజాస్వామ్యాన్ని మరణశయ్యపైకి చేర్చటమే తప్ప మరోటి కాదు. ప్రాతినిధ్య ప్రజాస్వామ్యం, లౌకిక ప్రజాతంత్ర విలువలతో కూడిన సామాజిక చైతన్యం, ఒక మనిషి ఒక ఓటు ఒక విలువ సూత్రం అమలు జరగాలంటే రానున్న ఎన్నికల్లో బీజేపీని గద్దె దించటం మినహా మరో మార్గం లేదు.
- కొండూరి వీరయ్య సెల్‌: 9871794037